തിരുവനന്തപുരം: മൂല്യവര്‍ധിത ഉല്‍പ്പന്നങ്ങള്‍ വിപണിയിലെത്തുമ്പോള്‍ ഉല്‍പാദിപ്പിച്ച കര്‍ഷകരെ വിസ്മരിക്കുകയും ലാഭം മുഴുവന്‍ ഇടനിലക്കാര്‍ തട്ടിയെടുക്കുകയും ചെയ്യുന്ന പ്രവണത അവസാനിപ്പിക്കുമെന്നും കര്‍ഷകരുടെ പൂര്‍ണ്ണ പങ്കാളിത്തത്തോടെ വിവിധ കാര്‍ഷിക സംരംഭങ്ങള്‍ ആരംഭിക്കുമെന്നും കൃഷി മന്ത്രി അഡ്വ. വി.എസ്.സുനില്‍കുമാര്‍ ഉറപ്പുനല്‍കി.
ഇന്ത്യന്‍ അഗ്രിക്കള്‍ച്ചറല്‍ അസോസിയേഷന്റെ വാര്‍ഷിക സമ്മേളനവും കാര്‍ഷിക സെമിനാറും തിരുവനന്തപുരം വൈ.എം.സി.എ. ഹാളില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കാര്‍ഷിക മേഖലയുടെ സുസ്ഥിര വികസനം ലക്ഷ്യം വച്ചു കൃഷിവകുപ്പ് ചില കര്‍മപരിപാടികള്‍ക്ക് രൂപം നല്‍കുന്നുണ്ടെന്ന് മന്ത്രി പറഞ്ഞു. ഓരോ ജില്ലയിലും വിവിധ വിഭവങ്ങളുടെ മൂല്യവര്‍ധിത ഉല്‍പന്നങ്ങള്‍ നിര്‍മിക്കുന്നതിന് കര്‍ഷകരെ പങ്കാളികളാക്കികൊണ്ടുളള അഗ്രിബിസിനസ് കമ്പനികള്‍ ആരംഭിക്കും. പ്രത്യേക കര്‍മസേന വിഭാഗവും ഈ കമ്പനിയോട് അനുബന്ധമായി രൂപീകരിക്കുന്നതായിരിക്കും. കര്‍ഷകരുടെ താല്‍പര്യങ്ങള്‍ക്കായിരിക്കും കൂടുതല്‍ പ്രാധാന്യം. കേരവിഭവങ്ങള്‍, ധാന്യങ്ങള്‍, പഴങ്ങള്‍, പച്ചക്കറികള്‍, സുഗന്ധവിളകള്‍, തേന്‍ തുടങ്ങി ഓരോ വിഭവങ്ങള്‍ക്കും പ്രത്യേക കമ്പനികള്‍ ആയിരിക്കും ജില്ലാതലത്തില്‍ രൂപീകരിക്കുക. ജൈവകൃഷി പ്രോത്സാഹിപ്പിക്കുന്നതിന് നിലവിലുള്ള സംവിധാനത്തിന്റെ ശാസ്ത്രീയമായ പുന:സംഘടന ആവശ്യമാണ്. വിവിധ കാര്‍ഷിക സംഘടനകള്‍, സര്‍വകലാശാല, കൃഷിവകുപ്പ് സ്ഥാപനങ്ങള്‍ എന്നിവയുടെ ഏകോപനം ആണ് ഇതിന്റെ പ്രാരംഭമായി നടപ്പിലാക്കുക. സര്‍ക്കാരിന്റെ പദ്ധതിയായ ഹരിതകേരളം നവംബര്‍ മാസം മുതല്‍ ആരംഭിക്കും. കാര്‍ഷിക മേഖലയ്ക്കായിരിക്കും ഇതില്‍ പ്രാധാന്യം. കാര്‍ഷിക മേഖലയെ കുറിച്ചുളള സമഗ്ര വിവരശേഖരണവും തയാറാക്കുവാന്‍ സര്‍ക്കാര്‍ തീരുമാനിച്ചിട്ടുണ്ട്.
കര്‍ഷകരെ കൂടി സമൂഹത്തിന്റെ മുന്‍നിരയില്‍ കൊണ്ടു വരിക എന്നതായിരിക്കണം നമ്മുടെ ലക്ഷ്യം. ഇന്ത്യന്‍ അഗ്രിക്കള്‍ച്ചറല്‍ അസോസിയേഷന്‍ പോലുളള പ്രൊഫഷണല്‍ സംഘടനകള്‍ക്ക് സമഗ്രസംഭാവനകള്‍ കര്‍ഷക സമൂഹത്തിന് നല്‍കാന്‍ കഴിയുമെന്നും മന്ത്രി കൂട്ടിച്ചേര്‍ത്തു. ചടങ്ങില്‍ കാര്‍ഷിക മേഖലയിലെ സമഗ്ര സംഭാവനകള്‍ക്കുളള പുരസ്‌കാരം മന്ത്രി നിര്‍വഹിച്ചു. കെ. രാമകൃഷ്ണപിളള, മുന്‍ ഡയറക്ടര്‍ ആര്‍. ഹേലി, മുന്‍ അഡിഷണല്‍ ഡയറക്ടര്‍ ഭാസ്‌ക്കരപണിക്കര്‍, ജൈവശ്രീ അവാര്‍ഡ് ജേതാവ് ഡോ. എന്‍. ജി ബാലചന്ദ്രനാഥ്, കര്‍ഷക തിലകം ഷൈല ബഷീര്‍, മികച്ച ഫാം ഓഫിസര്‍ പുരസ്‌കാരം നേടിയ സ്വര്‍ണ്ണവി, ഹോര്‍ട്ടികോര്‍പ്പ് എം.ഡി. ഡോ. രഞ്ജന്‍ എസ്. കരിപ്പായി, വി.എഫ്. പി.സി.കെ സി.ഇ.ഒ എസ്. കെ. സുരേഷ് തുടങ്ങിയവരെ മന്ത്രി ആദരിക്കുകയുണ്ടായി. ഇന്ത്യന്‍ അഗ്രിക്കള്‍ച്ചറല്‍ അസോസിയേഷന്‍ പ്രസിഡന്റ് എന്‍. വിജയന്റെ അധ്യക്ഷതയില്‍ കൂടിയ യോഗത്തില്‍ ജനറല്‍ സെക്രട്ടറി ഡോ. കെ.എം.അബ്ദുല്‍ ഖാദര്‍ സ്വാഗതവും ജോയിന്റ് സെക്രട്ടറി എസ്. വിജയകുമാര്‍ നന്ദിയും രേഖപ്പെടുത്തി.