കോവളം: സ്‌കൂള്‍ പരിസരത്ത് കുട്ടികളെ ലക്ഷ്യം വച്ച് കഞ്ചാവും മയക്കുമരുന്ന് ഉല്‍പന്നങ്ങളും വില്‍പന നടത്തിവരുന്ന സംഘത്തിലെ പ്രധാനിയെ കോവളം പൊലിസ് അറസ്റ്റ് ചെയ്തു.
വാഴമുട്ടം ഗവ. ഹൈസ്‌കൂള്‍ പരിസരത്ത് കഞ്ചാവ് വില്‍പന നടത്തിക്കൊണ്ടുനിന്ന ആഴാകുളം കരിങ്കാളി ക്ഷേത്രത്തിനു സമീപം അഖില ഭവനില്‍ അനി എന്നുവിളിക്കുന്ന അനില്‍കുമാറി (47) നെയാണ് കോവളം പൊലിസ് അറസ്റ്റുചെയ്തത്. വിഴിഞ്ഞം സി.ഐ കെ.ആര്‍ ബിജുവിന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ കോവളം എസ്.ഐ ജി. അജയകുമാറിന്റെ നേതൃത്വത്തില്‍ ക്രൈം എസ്.ഐ അജയകുമാര്‍, ദിനേശ് എന്നിവര്‍ ചേര്‍ന്നാണ് വില്‍പനക്കായി കഞ്ചാവുമായി എത്തിയ പ്രതിയെ പിടികൂടിയത്. പ്രതിയില്‍നിന്ന് ചെറിയ പൊതികളാക്കി വില്‍പനയ്ക്കായി സൂക്ഷിച്ചിരുന്ന 250 ഗ്രാമോളം തൂക്കമുള്ള കഞ്ചാവ് കണ്ടെടുത്തു. കഞ്ചാവ് കടത്തുന്ന മറ്റ് കണ്ണികളെക്കുറിച്ചുള്ള വിവരം പൊലിസിന് ലഭിച്ചതായി കോവളം എസ്.ഐ ജി. അജയകുമാര്‍ അറിയിച്ചു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.