തിരൂര്‍: താഴെപ്പാലത്തെ പുതിയ പാലത്തിന്റെ നിര്‍മാണ പ്രവൃത്തിക്കെത്തിയ അന്യസംസ്ഥാന തൊഴിലാളികള്‍ പണിമുടക്കി. പ്രവൃത്തി തുടങ്ങി ഒന്നര മാസം പിന്നിട്ടിട്ടും കരാറുകാരന്‍ കൂലി നല്‍കാത്തതിനെ തുടര്‍ന്നാണ് സമരം. ഉത്തര്‍പ്രദേശ്, ബിഹാര്‍, ബംഗാള്‍ സംസ്ഥാനക്കാരായ 17 തൊഴിലാളികളാണ് പണിമുടക്കിയത്.
കോഴിക്കോട് കേന്ദ്രീകരിച്ചു പ്രവര്‍ത്തിക്കുന്ന സ്വകാര്യ കമ്പനിക്കാണ് പാലത്തിന്റെ നിര്‍മാണച്ചുമതല. ഇവരില്‍നിന്നു കരാറെടുത്തവര്‍ക്കു കീഴിലുള്ള തൊഴിലാളികളാണ് ഭക്ഷണം കഴിക്കാന്‍പോലും പണമില്ലാതെ പ്രതിസന്ധിയിലായിരിക്കുന്നത്. കൂലി ആവശ്യപ്പെട്ടപ്പോള്‍ അനൂകൂല സമീപനമുണ്ടായില്ലെന്നും താമസസ്ഥലത്തുനിന്ന് ഒഴിഞ്ഞുപോകാന്‍ ആവശ്യപ്പെട്ടെന്നും തൊഴിലാളികള്‍ പറയുന്നു.
പാലത്തിന്റെ നിര്‍മാണ പ്രവൃത്തി നീണ്ടുപോകുന്നതായുള്ള ആക്ഷേപത്തിനു പിന്നാലെയാണ് ഈ പ്രശ്‌നം. പ്രവൃത്തി പൂര്‍ണമായും ഏറ്റെടുത്ത കമ്പനി പല ജോലികളും മറ്റു കരാറുകാര്‍ക്കാണ് നല്‍കിയത്. ഇത്തരത്തില്‍ സബ് കരാര്‍ എടുത്തയാള്‍ക്കു മാസം പേയ്‌മെന്റ്  മാത്രമാണ് നല്‍കിയതെന്നും കണക്കുകൂട്ടി പണം നല്‍കാത്തതാണ് തൊഴിലാളികള്‍ക്കും കുടിശ്ശിക വരാന്‍ കാരണമെന്നുമാണ് സൂചന. അതേസമയം, സബ് കരാറുകാരന്‍ കൂടുതല്‍ പണം കൈപ്പറ്റിയതായും ആക്ഷേപമുയര്‍ന്നിട്ടുണ്ട്. എന്നാല്‍, പ്രശ്‌നം വേഗത്തില്‍ പരിഹരിക്കുമെന്ന്  സബ് കരാറുകാരന്‍ പറഞ്ഞു.