കാഞ്ഞിരപ്പള്ളി: അനന്തുവിന് കൂട്ടുകാര്‍ക്കൊപ്പം ഓടിചാടി നടക്കണം. അതിന് സുമനസുകളായവരുടെ സഹായം കൂടിയെ തീരു. മൂന്ന് വര്‍ഷം മുന്‍പാണ് കാഞ്ഞിരപ്പള്ളി പഞ്ചായത്തില്‍ കൊരട്ടി ആലംപരപ്പ് ആര്യശേരില്‍ എ.ടി രാജേഷിന്റെ മകന്‍ അനന്തുവിന്റെ സ്വപ്നങ്ങള്‍ക്ക് മേല്‍ കരിനിഴലായി അപകടം സംഭവിച്ചത്.
2013 ജൂലൈ ഒന്‍പതിന് എരുമേലി ടൗണിനു സമീപം വഴിയിരികില്‍ നിന്നിരുന്ന അനന്തുവിനെ തടികയറ്റി വന്ന പിക്ക് -വാന്‍ ഇടിച്ചുവീഴ്ത്തുകയായിരുന്നു. അപകടത്തെ തുടര്‍ന്ന് തലയ്ക്ക് ഗുരുതര പരുക്കേറ്റ് കോട്ടയം മെഡിക്കല്‍ കോളജ് ആശുപത്രിയില്‍ ഒരു മാസത്തോളം ചികിത്സയില്‍ കഴിഞ്ഞ അനന്തുവിന് ജീവന്‍ തിരിച്ചുകിട്ടിയെങ്കിലും അബോധാവസ്ഥയിലായിരുന്നു പീന്നീടുള്ള ജീവിതം.
ചികിത്സയുടെയും പ്രാര്‍ഥനയുടെയും ഫലമായി ബോധം തിരിച്ചുകിട്ടിയെങ്കിലുംവലതുകണ്ണിന്റെ കാഴ്ച്ച നഷ്ടപെട്ടു. ഇപ്പോള്‍ പരസഹായമില്ലാതെ കട്ടിലില്‍ നിന്നും എഴുന്നേല്‍ക്കാന്‍ പോലും കഴിയാത്ത അവസ്ഥയിലാണ് ഈ ഇരുപതുകാരന്‍ ജീവിതം കഴിച്ചു കൂട്ടുന്നത്. കോട്ടയം മെഡിക്കല്‍ കോളജ്, എറണാകുളത്തെ സ്വകാര്യ ആശുപത്രി, വെല്ലൂര്‍ ക്രിസ്ത്യന്‍ മെഡിക്കല്‍ കോളജ് എന്നിവിടങ്ങളിലാണ് ഇതിനോടകം ചികിത്സ തേടിയത്. ഇപ്പോള്‍ തന്നെ മുപ്പത് ലക്ഷത്തോളം രൂപ ചികിത്സയ്ക്ക് ചിലവായി. ആകെയുള്ള ആറുസെന്റ് സ്ഥലവും വീടും മകന്റെ ചികിത്സയ്ക്കായി പണയപ്പെടുത്തി.
ബന്ധുക്കളുടെയും സുഹൃത്തുക്കളുടെയും നാട്ടുകാരുടെയും സഹായംകൊണ്ടാണ് ഇത്രയും നാള്‍ ചികിത്സ നടത്തി വന്നത്. ടാപ്പിങ് തൊഴിലാളിയായ രാജേഷ് തുടര്‍ചികിത്സയ്ക്ക് പണം കണ്ടെത്തുന്നതിനായി നെട്ടോട്ടമോടുകയാണ്. മൂന്ന് മാസത്തെ വിദഗ്ദ ചികിത്സയ്ക്കായി വെല്ലൂര്‍ ക്രിസ്ത്യന്‍ മെഡിക്കല്‍ കോളജിലേയ്ക്ക് ഇന്ന് യാത്ര തിരിക്കും. മൂന്ന് ലക്ഷത്തോളം രൂപയാണ് ചികിത്സാചിലവായി പ്രതീക്ഷിക്കുന്നത്. വീട്ടില്‍ നിന്നും വെല്ലൂരിലെ ആശുപത്രിയിലെത്തിക്കുന്നതിന് ആംബുലന്‍സ് ചാര്‍ജായി 25,000 രൂപ നല്‍കേണ്ടി വരും. ചികിത്സ പൂര്‍ത്തിയാകുന്നതോടെ കൈകാലുകളുടെ ചലനശേഷി നഷ്ടമായ അനന്തുവിന് പൂര്‍വസ്ഥിതിയിലേയ്ക്ക് തിരിച്ചു വരാനാകും. ചിറക്കടവ് എസ്. ആര്‍. വി. എന്‍. എസ്. എസ്. സ്‌കൂളില്‍ പ്ലസ് ടു വിദ്യാര്‍ഥിയായിരിക്കുമ്പോഴാണ് അപകടം സംഭവിക്കുന്നത്. അനന്തുവിന് ഈ അവസ്ഥയില്‍ നിന്നും തിരിച്ചു വരാന്‍ നാടൊന്നാകെ പ്രാര്‍ഥനയിലാണ്.
മറ്റുള്ളവര്‍ക്കൊപ്പം എഴുന്നേറ്റ് നടക്കാമെന്ന് പ്രതീക്ഷയില്‍ കഴിയുന്ന ഈ കൊച്ചുമിടുക്കനെ ജീവിതത്തിലേയ്ക്ക് കൈപിടിച്ചുയര്‍ത്താന്‍ നല്ലമനസുകളുടെ സഹായം ആവശ്യമാണ്. സൗത്ത് ഇന്ത്യന്‍ ബാങ്ക്, എരുമേലി ശാഖ. എ.ടി രാജേഷ്, അക്കൗണ്ട് നമ്പര്‍: 0146053000022125. ഐ. എഫ്.സി കോഡ്: എസ്.ഐ.ബി.എല്‍ 0000146. ഫോണ്‍: 9048412920.