കാക്കനാട്: എറണാകുളം ജില്ലാ സഹകരണ ബാങ്കിലെ ചെടിച്ചട്ടിയിലെ കൃഷി വിളവെടുപ്പ് കൊയ്ത്തുത്സവം ഉദ്ഘാടനം ജില്ലാ പഞ്ചായത്ത് പ്രസിഡന്റ് ആശ സനില്‍ നിര്‍വഹിച്ചു. ഇരുന്നൂറില്‍ പരം ചെടിച്ചട്ടികളിലാണ് ഇത്തരത്തില്‍ നെല്‍കൃഷി ചെയ്തിരിക്കുന്നത്. കഴിഞ്ഞ മാര്‍ച്ച് മാസത്തിലാണ് ഒക്കല്‍ ഫാമില്‍ നിന്നും ഉമ ഇനത്തില്‍പ്പെട്ട നെല്‍വിത്ത് കൊണ്ടുവന്ന് കൃഷി ചെയ്തത്. കൂടാതെ പന്ത്രണ്ടായിരം രൂപയോളം മുടക്കി ബാങ്കില്‍ ആരംഭിച്ചിട്ടുളള മത്സ്യവും പച്ചക്കറികളും സമന്വയിപ്പിച്ചുകൊണ്ടുളള അക്വാപോണിക്‌സ് യൂണിറ്റില്‍ നിന്നുളള മത്സ്യങ്ങളുടെ വിളവെടുപ്പു ഉദ്ഘാടനം ബാങ്ക് പ്രസിഡന്റ് എന്‍ .പി.പൗലോസ് നിര്‍വഹിച്ചു.
ബാങ്ക് വൈസ് പ്രസിഡന്റ് പി.പി. ഉതുപ്പാന്‍, എം.ഇ ഹസൈനാര്‍, ബാങ്ക് ഡയറക്ടര്‍മാര്‍, ജനറല്‍ മാനേജര്‍ എം.കെ. രാധാകൃഷ്ണന്‍ തുടങ്ങിയവര്‍ സന്നിഹിതരായിരുന്നു. ജില്ലാ സഹകരണ ബാങ്ക് പരിസരത്തെ നെല്‍കൃഷി കൂടാതെ ചെടിച്ചട്ടിയില്‍ തക്കാളി, പച്ചമുളക്, ചീര, പൊതാനയില, വഴുതന, പയര്‍, അടക്കം വിവിധയിനം പച്ചക്കറികളും വിളഞ്ഞ് നില്‍ക്കുന്നത് കൗതുക കാഴ്ചയുണര്‍ത്തുന്നു. ജൈവകൃഷി പ്രോത്സാഹന പദ്ധതിയുടെ ഭാഗമായാണ് കരനെല്‍കൃഷിയും പച്ചക്കറികൃഷിയും ബാങ്കില്‍ നടപ്പിലാക്കിയിട്ടുളളത്.
ജില്ലയിലെ പ്രാഥമിക കാര്‍ഷിക വായ്പാ സംഘങ്ങള്‍ക്ക് സബ്‌സിഡി നിരക്കില്‍ പച്ചക്കറി വിത്തുകളും തൈകളും നല്‍കി സംഘം തലത്തിലും ജൈവകൃഷി പ്രോത്സാഹിപ്പിക്കുന്നതിനുളള നടപടികള്‍ ബാങ്ക് സ്വീകരിച്ചിട്ടുണ്ട്. നടപ്പ് സാമ്പത്തികവര്‍ഷം കാര്‍ഷിക മേഖലയില്‍ കൂടുതല്‍ വായ്പകള്‍ അനുവദിക്കുന്നതിനും തീരുമാനിച്ചതായും കര്‍ഷകര്‍ക്കും, മറ്റും പ്രചോദനമാകുന്നതിനും വേണ്ടിയാണ് ജില്ല ബാങ്ക് പരിസരത്ത് ചെടിച്ചട്ടിയില്‍ കൃഷി തോട്ടം യഥാര്‍ത്ഥ്യമാക്കിയിരിക്കുന്നതെന്നും ജനറല്‍ മാനേജര്‍ എം.കെ. രാധാകൃഷ്ണന്‍ പറഞ്ഞു.