കല്‍പ്പറ്റ: ജില്ലാ അത്‌ലറ്റിക്‌സ് ചാംപ്യന്‍ഷിപ്പ് നാളെ മുതല്‍ മാനന്തവാടി വൊക്കേഷണല്‍ ഹയര്‍സെക്കന്‍ഡറി സ്‌കൂള്‍ ഗ്രൗണ്ടില്‍ നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. 14, 16, 18, 20 വയസുകള്‍ക്ക് താഴെയും 20 വയസിന് മുകളിലുമായി കാറ്റഗറികള്‍ തിരിച്ച് സബ്ജൂനിയര്‍, ജൂനിയര്‍, സീനിയര്‍ തലങ്ങളിലാണ് മത്സരങ്ങള്‍ നടക്കുക.
ജില്ലയിലെ 38 ക്ലബുകളില്‍ നിന്നുള്ള 600ഓളം കായികതാരങ്ങളാണ് ചാമ്പ്യന്‍ഷിപ്പില്‍ മാറ്റുരക്കുക. ഈ മത്സരത്തില്‍ നിന്നുള്ള ജേതാക്കളാണ് ഈമാസം 28ന് എറണാകുളത്ത് നടക്കുന്ന സംസ്ഥാന ചാമ്പ്യന്‍ഷിപ്പില്‍ പങ്കെടുക്കുക. നവംബര്‍ 18 മുതല്‍ വിശാഖപട്ടണത്ത് നടക്കുന്ന നാഷണല്‍ ഇന്റര്‍ ഡിസ്ട്രിക്റ്റ് അത്‌ലറ്റിക്‌സിനുള്ള ജില്ലാ ടീമിനെ തെരഞ്ഞെട്ടുക്കുന്നതും ഈ ചാമ്പ്യന്‍ഷിപ്പില്‍ നിന്നായിരിക്കും.
ചാമ്പ്യന്‍ഷിപ്പിന്റെ ഉദ്ഘാടനം നാളെ ഉച്ചക്ക് 12ന് മാനന്തവാടി നഗരസഭാ ചെയര്‍മാന്‍ വി.ആര്‍ പ്രവീജ് നിര്‍വഹിക്കും. ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് എം. മധു മുഖ്യാഥിതിയാവും. ഒന്‍പതിന് നടക്കുന്ന സമാപന സമ്മേളനത്തില്‍ മാനന്തവാടി വി.എച്ച്.എസ്.ഇ പ്രധാനധ്യാപകന്‍ പി. ഹരിദാസ് സമ്മാനദാനം നിര്‍വഹിക്കും. വാര്‍ത്താസമ്മേളനത്തില്‍ അസോസിയേഷന്‍ ജില്ലാ പ്രസിഡന്റ് കെ.പി ജോയി, സെക്രട്ടറി പ്രൊഫ. കെ.വി ജോസഫ്, ജോയിന്റ് സെക്രട്ടറി സി.പി സജി പങ്കെടുത്തു.