ആയഞ്ചേരി: കുടുംബശ്രീയുടെയും പാടശേഖര സമിതിയുടെയും സഹകരണത്തോടെ നടപ്പാക്കുന്ന ആയഞ്ചേരി റൈസിന്റെ ഒരുക്കങ്ങള്‍ തുടങ്ങി. പഞ്ചായത്തിലെ 200ഓളം ഏക്കറില്‍ വ്യാപിച്ച് കിടക്കുന്ന നെല്‍വയലുകളില്‍ ജൈവ നെല്‍കൃഷിയുടെ ഉല്‍പാദനവും വിപണനവും ലക്ഷ്യമാക്കിയാണ് പദ്ധതി നടപ്പാക്കുന്നത്.
 പദ്ധതിയുടെ ഉദ്ഘാടനം ഗ്രാമ പഞ്ചായത്ത് പ്രസിഡന്റ് എം.എം നഷീദ ടീച്ചര്‍ നിര്‍വഹിച്ചു. വൈസ് പ്രസിഡന്റ് പി.എം ഷിജിത്ത് മാസ്റ്റര്‍ അധ്യക്ഷനായി. സ്റ്റാന്റിങ് കമ്മിറ്റി ചെയര്‍മാന്‍ നൊച്ചാട്ട് കുഞ്ഞബ്ദുല്ല, ഗ്രാമപഞ്ചായത്തംഗങ്ങളായ ടി.പി കുഞ്ഞിരാമന്‍ മാസ്റ്റര്‍, കൗല ഗഫൂര്‍, തൊഴിലുറപ്പ് പദ്ധതി ഓവര്‍ സിയര്‍ ഇല്യാസ് മാങ്ങോട് സംബന്ധിച്ചു. പദ്ധതിയുടെ പ്രാരംഭപ്രവര്‍ത്തനമെന്ന നിലയില്‍ കൃഷിക്ക് വെള്ളമെത്തിക്കാനുള്ള തോടുനിര്‍മാണം, വരമ്പ് നിര്‍മാണം, നിലമൊരുക്കല്‍ എന്നീ പ്രവൃത്തികളാണ് ഇപ്പോള്‍ നടക്കുന്നത്. ഗ്രാമീണ തൊഴിലുറപ്പ് പദ്ധതിയില്‍ ഉള്‍പ്പെടുത്തിയാണ് പ്രവൃത്തി നടപ്പിലാക്കുന്നത്.