തിരൂര്‍: പാതയോരങ്ങള്‍ പ്ലാസ്റ്റിക് രഹിതമാക്കാന്‍ വിദ്യാര്‍ഥികളുടെ നേത്യത്വത്തില്‍ മാതൃകാ പ്രവര്‍ത്തനം തുടങ്ങി. താനൂര്‍ ഫിഷറീസ് വൊക്കേഷണല്‍ ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥികളാണ് കര്‍മപദ്ധതിയുമായി മുന്നിട്ടിറങ്ങിയിരിക്കുന്നത്. വിദ്യാലയ പരിസരത്തും സമീപ പ്രദേശങ്ങളിലും പ്ലാസ്റ്റിക്കിന്റെ ഉപയോഗം കുറക്കുകയെന്ന ലക്ഷ്യത്തോടെയാണ് പ്ലാസ്റ്റിക്‌രഹിത പാതയോരം, പ്ലാസ്റ്റിക് വിമുക്ത കാംപസ് പദ്ധതികള്‍ക്കു തുടക്കമിട്ടത്.
സ്‌കൂളിലെ എന്‍.എസ്.എസ് യൂനിറ്റിന്റെ സഹകരണത്തോടെയാണ് പദ്ധതി.
സ്‌കൂളിന്റെ ഒരു കിലോമീറ്റര്‍ ചുറ്റളവില്‍ റോഡരികിലെ പ്ലാസ്റ്റിക്കുകള്‍ നീക്കം ചെയ്തു. താനൂര്‍ കമ്മ്യൂനിറ്റി ഹെല്‍ത്ത് സെന്റര്‍ പരിസരവും ശുചികരിച്ചു. പ്രധാന സര്‍ക്കാര്‍ സ്ഥാപനങ്ങളിലും ശുചീകരണം നടത്തും. വീടുകളില്‍  ബോധവല്‍ക്കരണം നടത്താനും തീരുമാനമുണ്ട്.
പദ്ധതികളുടെ ഉദ്ഘാടനം താനൂര്‍ നഗരസഭ വൈസ് ചെയര്‍മാന്‍ സി. മുഹമ്മദ് അഷറഫ് നിര്‍വഹിച്ചു. പി.ടി.എ പ്രസിഡന്റ് ടി. ജാഫര്‍ അധ്യക്ഷനായി. പ്രിന്‍സിപ്പല്‍ സജിത, അധ്യാപകരായ ജയശ്രീ, ഉഷ, സുനില്‍, സക്കീര്‍ സംസാരിച്ചു.