മാറഞ്ചേരി: പെരുമ്പടപ്പ് ഗ്രാമപഞ്ചായത്തിലെ 160 ഏക്കറോളം വരുന്ന അയിരൂര്‍ കുട്ടാടന്‍പാടത്തെ നെല്‍കര്‍ഷകര്‍ മഴ ലഭ്യത കുറഞ്ഞതിനാല്‍ പ്രതിസന്ധിയില്‍. ഇവിടെ ഓരോ തവണയും കൃഷിയിറക്കുമ്പോള്‍ കഴിഞ്ഞ തവണത്തെക്കാള്‍ വിളവ് ലഭിക്കാറുണ്ട്.
    എന്നാല്‍ ഇത്തവണ മഴയില്ലാതായതോടെ കര്‍ഷകര്‍ ആശങ്കയിലാണ്.
കൃഷി ആരംഭിച്ചു രണ്ടാഴ്ച പിന്നിട്ടെങ്കിലും കാര്യമായി ജലം ലഭിച്ചിട്ടില്ല. വെള്ളമില്ലാത്തിനാല്‍ പാടം വറ്റിവരണ്ടതോടെയാണ് കര്‍ഷകര്‍ ആശങ്കയിലായത്.
താല്‍ക്കാലിക പരിഹാരമെന്നോളം സമീപത്തെ ഇടതോടില്‍നിന്നു മോട്ടോര്‍ വഴി പാടത്തേക്കു വെള്ളമെത്തിക്കുകയാണ്. ഇതിനായി മോട്ടോര്‍ വാടക, ഡീസല്‍ ചെലവ് തുടങ്ങിയവ കര്‍ഷകരെ കൂടുതല്‍ സാമ്പത്തിക പ്രതിസന്ധിയിലേക്കു തള്ളിവിടുകയും ചെയ്യുന്നു.
മഴ തീരെ ലഭിച്ചില്ലെങ്കില്‍ ഇത്തവണത്തെ കൃഷി പൂര്‍ണമായും നശിക്കുമെന്നാണ് കര്‍ഷകര്‍ പറയുന്നത്. അയിരൂര്‍ കുട്ടാടന്‍ പാടത്തിന്റെ വിവിധ ഭാഗങ്ങളിലായി പത്തോളം മോട്ടോര്‍ സ്ഥാപിച്ചാണ് നിലവില്‍ വെള്ളമെത്തിക്കുന്നത്.