പയ്യന്നൂര്‍: പൊലിസുദ്യോഗസ്ഥന്‍ ഓടിച്ച ജീപ്പ് വൈദ്യുതി പോസ്റ്റിലിടിച്ചു. അപകടത്തില്‍ കാസര്‍കോട് ടൗണ്‍ ട്രാഫിക് സ്റ്റേഷന്‍ അഡിഷണല്‍ എസ്.ഐ മാവിച്ചേരിയിലെ എ ബാബക്കു പരുക്കേറ്റു. ഇയാളെ പയ്യന്നൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഇന്നലെ ഉച്ചക്ക് ഒരു മണിയോടെയാണ് സംഭവം. പുതിയ ബസ് സ്റ്റാന്‍ഡില്‍ നിന്നു മാവിച്ചേരിയിലേക്കുള്ള റോഡിലാണ് അപകടം നടന്നത്. റോഡരികിലെ ഹൈടെന്‍ഷന്‍ പോസ്റ്റില്‍ ബാബ ഓടിച്ച ജീപ്പ് ഇടിക്കുകയായിരുന്നു. ഇടിയുടെ ആഘാതത്തില്‍ പോസ്റ്റ് നെടുകെ പൊട്ടിവീണു. സംഭവ സമയം ഇവിടെ ആളുകള്‍ ഇല്ലാത്തതിനാല്‍ വന്‍ ദുരന്തം ഒഴിവായി. സംഭവ സമയം ലൈനില്‍ വൈദ്യുതിയുണ്ടായിരുന്നു.
പൊലിസ് ഉദ്യോഗസ്ഥന്‍ മദ്യപിച്ച് വാഹനം ഓടിച്ചതാണ് അപകടത്തിന് കാരണമായതെന്ന് നാട്ടുകാര്‍ ആരോപിച്ചു. അശ്രദ്ധമായി വാഹനമോടിച്ചതിന് ഇയാള്‍ക്കെതിരേ നടപടിയെടുക്കണമെന്നും നാട്ടുകാര്‍ ആവശ്യപ്പെട്ടു.