കോഴിക്കോട്: ഏഴാമത് സി.ബി.എസ്.ഇ മേഖലാ കലോത്സവം വടകരയില്‍ നടക്കും. സ്റ്റേജിതര മത്സരങ്ങള്‍ 14, 15 തിയതികളില്‍ ഗോകുലം പബ്ലിക് സ്‌കൂളിലും സ്റ്റേജ് ഇനങ്ങള്‍ 21, 22, 23 തിയതികളില്‍ വടകര ടൗണ്‍ഹാളിലുമാണ് നടക്കുകയെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. കോഴിക്കോട്, കണ്ണൂര്‍ ജില്ലകളിലെ 54 സ്‌കൂളുകളില്‍ നിന്നായി 2800ഓളം കുട്ടികള്‍ മത്സരങ്ങളില്‍ പങ്കെടുക്കും. ഒന്നാം ക്ലാസ് മുതല്‍ പ്ലസ്ടു വരെയുള്ള വിദ്യാര്‍ഥികള്‍ക്കായി അഞ്ചു വിഭാഗങ്ങളിലാണ് മത്സരങ്ങള്‍.
കലോത്സവത്തിന്റെ ഉദ്ഘാടനം 14ന് ഗോകുലം പബ്ലിക് സ്‌കൂളില്‍ നടക്കുന്ന ചടങ്ങില്‍ കെ.പി രാമനുണ്ണി നിര്‍വഹിക്കും. കഥകളി ആചാര്യന്‍ ഗുരു ചേമഞ്ചേരി കുഞ്ഞിരാമന്‍ നായരെ ചടങ്ങില്‍ ആദരിക്കും. സ്റ്റേജ് മത്സരങ്ങളുടെ ഉദ്ഘാടനം ജില്ലാ പൊലിസ് സൂപ്രണ്ട് എന്‍. വിജയകുമാര്‍ നിര്‍വഹിക്കും. കലോത്സവത്തില്‍ ഒന്ന്, രണ്ട് സ്ഥാനങ്ങള്‍ നേടുന്നവര്‍ക്ക് നവംബര്‍ 17 മുതല്‍ 20 വരെ അടിമാലിയില്‍ നടക്കുന്ന സംസ്ഥാന കലോത്സവത്തില്‍ പങ്കെടുക്കാന്‍ അവസരം ലഭിക്കും. വാര്‍ത്താസമ്മേളനത്തില്‍ വടകര സഹോദയ പ്രസിഡന്റ് എ.പി സോമന്‍, സെക്രട്ടറി സുനില്‍ കായക്കൊടി, ഗോകുലം പബ്ലിക് സ്‌കൂള്‍ പ്രിന്‍സിപ്പല്‍ ജ്യോതി സുരേഷ് സംബന്ധിച്ചു.