ഇരിട്ടി: വനത്തില്‍  നിന്നു മുറിച്ചു കൊണ്ടു വന്നതെന്ന് സംശയിക്കുന്ന തേക്കിന്‍ തടികളുമായി രണ്ടുപേരെ വനംവകുപ്പ് അറസ്റ്റു ചെയ്തു.
മുണ്ടയാംപറമ്പ് നാട്ടേല്‍ സ്വദേശികളായ ആലക്കാമുറി ബിന്റോ ജോസഫ ്(26), താഴേക്കണ്ടി രാജേഷ് (23) എന്നിവരെയാണ് ആറു കഷണം തേക്കിന്‍ തടികളുമായി ഇരിട്ടി സെക്ഷന്‍ ഫോറസ്റ്റര്‍ മനോഹരന്‍ കോട്ടാത്തിന്റെ നേതൃത്വത്തിലുള്ള സംഘം പിടികൂടിയത്.
മരം സൂക്ഷിച്ചിരുന്ന മാണിയകുളം സിജോ ഉള്‍പ്പെടെ മൂന്നുപേരെ കൂടി പിടികിട്ടാനുണ്ട്. റബര്‍ തോട്ടത്തില്‍ ഒളിപ്പിച്ചിരുന്ന മരത്തടികള്‍  അറുത്തു ഉരുപ്പടികളാക്കാന്‍ മില്ലിലേക്കു കൊണ്ടു പോകാനായി റോഡില്‍ ഇറക്കുമ്പോളാണ് പ്രതികളെ പിടികൂടിയതെന്ന് വനംവകുപ്പ് അറിയിച്ചു.
കൊട്ടിയൂര്‍ റേഞ്ചര്‍ വി രതീശന് കിട്ടിയ രഹസ്യ വിവരത്തെ തുടര്‍ന്നായിരുന്നു പരിശോധന. തോലമ്പ്ര സെക്ഷന്‍ ഫോറസ്റ്റര്‍ കെ.വി ആനന്ദ്, ഗാര്‍ഡുമാരായ കെ.പി മുകേഷ്, ഹരിശങ്കര്‍ പഴയിടത്ത്, കെ.കെ ഷിനിത്, കെ.എസ് ബാബു, എന്‍ കൃഷ്ണന്‍കുട്ടി എന്നിവരും പരിശോധനയില്‍ പങ്കെടുത്തു.