ആറ്റിങ്ങല്‍: കാമുകിയെ കാണാന്‍ വരുന്നത് വിലക്കിയതിന് കാമുകനും സംഘവും കാമുകിയുടെ മക്കളെ ആക്രമിച്ചു.
സംഭവവുമായി ബന്ധപ്പെട്ട് മൂന്നു പേരെ ആറ്റിങ്ങല്‍ പൊലിസ് അറസ്റ്റു ചെയ്തു. കാമുകനായ ആലംകോട് വഞ്ചിയൂര്‍ കട്ടപ്പറമ്പ് കുന്നില്‍ വീട്ടില്‍ അഖില്‍ (27), സുഹൃത്തുക്കളായ പട്ടള പുത്തന്‍ വീട്ടില്‍ മനു( 31), വഞ്ചിയൂര്‍ ഊരൂര്‍ക്കോണം ലീലാ ഭവനില്‍ ബാബു (42) എന്നിവരാണ് അറസ്റ്റിലായത്.
കഴിഞ്ഞ രണ്ടു ദിവസങ്ങളിലായാണ് സംഭവം. രണ്ടു ദിവസം മുന്‍പ് വഞ്ചിയൂര്‍ പട്ടളയിലെ മധ്യവയസ്‌കയായ സ്ത്രീയുടെ മുറിയില്‍ ഇയാളെ സ്ത്രീയുടെ മക്കള്‍ കണ്ടിരുന്നു. തുടര്‍ന്ന് രക്ഷപ്പെടുന്നതിനായി ഇയാള്‍ വീടിന്റെ ടെറസില്‍ കയറി താഴേക്കു ചാടി. വീഴ്ചയില്‍ പരുക്കേറ്റ ഇയാളെ നാട്ടുകാര്‍ അറിയിച്ചതനുസരിച്ച് പൊലിസെത്തി ആശുപത്രിയില്‍ പ്രവേശിപ്പിച്ചു. സ്ത്രീയുടെ മക്കള്‍ ഇയാള്‍ക്ക് താക്കീതും നല്‍കിയിരുന്നു. എന്നാല്‍ തൊട്ടടുത്ത ദിവസം ആശുപത്രിയില്‍ നിന്നു ചികിത്സ കഴിഞ്ഞിറങ്ങിയ കാമുകന്‍ സുഹൃത്തുക്കളേയും കൂട്ടി കാമുകിയുടെ രണ്ട് ആണ്‍മക്കളെയും സമീപത്തെ കടയുടമയെയും ആക്രമിച്ചു.
മൂന്നു പേര്‍ക്കും സാരമായി പരുക്കേറ്റിട്ടുണ്ട്. പ്രണയ വിവരം പുറത്തു പറഞ്ഞതിലുള്ള വിരോധമാണ് അക്രമത്തില്‍ കലാശിച്ചതെന്ന് പറയുന്നു.