ആറ്റിങ്ങല്‍: മൂവാറ്റുപുഴ പൊലിസിന്റെ മര്‍ദനത്തില്‍ ഗുരുതരമായി പരുക്കേറ്റ് ആറ്റിങ്ങല്‍ വലിയകുന്ന് താലൂക്ക് ആശുപത്രിയില്‍ ചികിത്സയില്‍ കഴിയുന്ന ആറ്റിങ്ങല്‍ കൊട്ടിയോട് മോളി കോട്ടേജില്‍ ആര്‍.എസ്. പ്രദീഷിനെ (36) കാണാന്‍ പ്രതിപക്ഷ നേതാവ് രമേശ് ചെന്നിത്തല എത്തി. ഇന്നലെ രാവിലെയാണ് അദ്ദേഹം എത്തിയത്. യുവാവിനോട് കാര്യങ്ങള്‍ ചോദിച്ചറിഞ്ഞ ചെന്നിത്തല ഇതുസംബന്ധിച്ച പരാതിയും സ്വീകരിച്ചു.
കുറ്റക്കാരായ മൂവാറ്റുപുഴയിലെ പൊലീസുകാരെ സര്‍വീസില്‍ നിന്ന് പിരിച്ചു വിടണമെന്നും സംഭവത്തെക്കുറിച്ച് എസ്.സി.എസ്.ടി കമ്മിഷന്‍ അന്വേഷിക്കണമെന്നും നിയമസഭയില്‍ ഈ വിഷയം അവതരിപ്പിക്കുമെന്നും ചെന്നിത്തല പറഞ്ഞു.
നട്ടെല്ലിന് സാരമായി പരുക്കേറ്റ പ്രദീഷിന് അടിയന്തരമായി സ്‌കാനിങ് വേണമെന്ന് ഡോക്ടര്‍മാര്‍ നിര്‍ദേശിച്ചിരുന്നു. ആറ്റിങ്ങല്‍ ആശുപത്രിയില്‍ അതിനുള്ള സൗകര്യങ്ങള്‍ ഇല്ലാത്തതിനാല്‍ പ്രതിപക്ഷനേതാവിന്റെ നിര്‍ദേശപ്രകാരം കോണ്‍ഗ്രസ് പ്രവര്‍ത്തകരുടെ നേതൃത്വത്തില്‍ സ്‌കാനിങിന് മെഡിക്കല്‍ കോളജിലേയ്ക്ക് കൊണ്ടുപോയി തിരിച്ചെത്തിച്ചു.