മലയിന്‍കീഴ്: മാറനല്ലൂര്‍ എസ്.ഐ ശാന്തകുമാര്‍, ഡ്രൈവര്‍ രാഹുല്‍ എന്നിവര്‍ക്ക് നേരെ ആക്രമണം നടത്തിയ കേസിലെ ഒന്നാം പ്രതി അറസ്റ്റില്‍.
മാറനല്ലൂര്‍ കീളിയോട് അഴക് തോട്ടത്തിന്‍ വീട്ടില്‍ എം. അനീഷ് (31) ആണ് പിടിയിലായത്. സെപ്റ്റംബര്‍ മൂന്നിന് രാത്രിയിലായിരുന്നു കേസിനാസ്പദമായ സംഭവം. മദ്യപിച്ച് ബഹളം ഉണ്ടാക്കുന്നതായി വിവരം ലഭിച്ചതിനെ തുടര്‍ന്ന് എത്തിയ എസ്.ഐയെയും ഡ്രൈവറെയും അനീഷും സുഹൃത്ത് പെരുമുള്ളൂര്‍ വഴുതൂര്‍ പവിത്രാനന്ദ കോളനിയില്‍ എസ്. ഷൈനും(27) ആക്രമിക്കുകയായിരുന്നു.എസ്.ഐയെ തള്ളിമാറ്റി അനീഷ് ഓടി രക്ഷപ്പെട്ടെങ്കിലും രണ്ടാംപ്രതി ഷൈനിനെ അപ്പോള്‍ തന്നെ പിടികൂടിയിരുന്നു. തുടര്‍ന്ന് ഒളിവില്‍ പോയ അനീഷിനെ ഇന്നലെ ഉച്ചയ്ക്ക് മണ്ണടികോണത്തുനിന്നാണ് എസ്.ഐ ശാന്തകുമാറും സംഘവും പിടികൂടിയത്.
ഇയാള്‍ക്കെതിരേ മാറനല്ലൂര്‍, ശ്രീകാര്യം, മലയിന്‍കീഴ് സ്റ്റേഷനുകളില്‍ അബ്കാരി, അടിപിടി, മാരകായുധങ്ങള്‍ കൈവശം വയ്ക്കല്‍ ഉള്‍പ്പെടെ നിരവധി കേസുകള്‍ നിലവിലുള്ളതായി പൊലിസ് അറിയിച്ചു.