കൊല്ലം: ജില്ലാ എക്‌സൈസ് സര്‍ക്കിള്‍ സംഘം നടത്തിയ റെയ്ഡില്‍ കൊല്ലം പള്ളിമുക്ക് വൈന്‍മുക്ക് ഭാഗത്തുനിന്നും 60 പൊതി കഞ്ചാവുമായി ഒരാളെ അറസ്റ്റ് ചെയ്തു. കൊല്ലം മുണ്ടയ്ക്കല്‍ പുതുവല്‍ പുരയിടത്തില്‍ ബീച്ച് നഗര്‍ 39 ല്‍ അയ്യപ്പന്‍ എന്നുവിളിക്കുന്ന വിനോദ് (35) എന്നയാളിനെയാണ് അറസ്റ്റ് ചെയ്തത്. കഞ്ചാവ് ചെറുപൊതികളിലാക്കി ഇരവിപുരം, പള്ളിമുക്ക് പ്രദേശങ്ങളിലാണ് പ്രതി വില്‍പ്പന നടത്തുന്നത്. പ്രതിയില്‍ നിന്നും കഞ്ചാവ് വാങ്ങുന്നവരെപ്പറ്റി എക്‌സൈസിന് സൂചന ലഭിച്ചിട്ടുണ്ട്. ഇരവിപുരം ഭാഗങ്ങളില്‍ വ്യാപകമായ കഞ്ചാവ് വില്‍പ്പന നടത്തുന്നതായി എക്‌സൈസിന് വിവരം ലഭിച്ചതിനെത്തുടര്‍ന്ന് ഷാഡോ സംഘത്തെ നിയോഗിച്ചിരുന്നു. റെയ്ഡില്‍ എക്‌സൈസ് സി.ഐ വി രാജേഷിനൊപ്പം എക്‌സൈസ് ഇന്‍സ്‌പെക്ടര്‍മാരായ ജെ.പി ആന്‍ഡ്രൂസ്, അസി. എക്‌സൈസ് ഇന്‍സ്‌പെക്ടര്‍മാരായ ബാലചന്ദ്രകുമാര്‍, ഫ്രാന്‍സിസ് ബോസ്‌കോ, സിവില്‍ എക്‌സൈസ് ഓഫിസര്‍മാരായ സുരേഷ് ബാബു, രാജു, രഞ്ജിത്, മണിലാല്‍ പങ്കെടുത്തു.