തൊടുപുഴ: കട്ടപ്പനക്കു സമീപം പുഷ്പഗിരിയില്‍ വാഹനാപകടത്തില്‍ മരിച്ച അഞ്ചുപേരുടെയും കണ്ണുകള്‍ ഇനിയും ജീവിക്കും. മരിച്ചവരുടെ കണ്ണുകള്‍ ദാനം ചെയ്യാന്‍ വീട്ടുകാര്‍ തീരുമാനിച്ചതിനാല്‍ സമ്മതപത്രം ഇന്നലെ രാത്രിതന്നെ ആശുപത്രി അധികൃതര്‍ക്കു കൈമാറി. മുണ്ടക്കയം മെഡിക്കല്‍ ട്രസ്റ്റ് ആശുപത്രിയിലെത്തിച്ച മൃതദേഹങ്ങളില്‍നിന്നു കണ്ണുകള്‍ നീക്കം ചെയ്തു സൂക്ഷിച്ചിരിക്കുകയാണ്. അപകടത്തില്‍ മരിച്ച കാഞ്ഞിരപ്പള്ളി കൊച്ചുപറമ്പില്‍ മാത്യൂവിന്റെ ഭാര്യ അച്ചാമ്മ(70), മകന്‍ ഷാജു(45), മകള്‍ ജയിന്‍(34), ഷാജുവിന്റെ മകന്‍ ഇവാന്‍ (ഒന്നര), ഡ്രൈവര്‍ ടിജോ(26) എന്നിവരുടെ കണ്ണുകളിലാണ് ഇനിയും ജീവന്‍ തുടിക്കുന്നത്.
ദു:ഖത്തിന്റെ വേദനയില്‍ നീറുന്നതിനിടയിലാണു വീട്ടുകാര്‍ അവയവദാനത്തിനു സമ്മതം നല്‍കിയത്. തങ്ങളുടെ ഉറ്റവര്‍ അകാലത്തില്‍ ആകസ്മികമായി യാത്രപോലും ചോദിക്കാതെ വിടപറഞ്ഞെങ്കിലും അവരുടെ കണ്ണുകള്‍ മറ്റുള്ളവര്‍ക്കു കാഴ്ചയേകാന്‍ ബന്ധുക്കള്‍ ആശുപത്രി അധികൃതരോട് അഭ്യര്‍ഥിക്കുകയായിരുന്നു. മരിച്ച ജയിന്‍ ഏഴുമാസം ഗര്‍ഭിണിയാണ്.
കട്ടപ്പന തോപ്രാംകുടി റോഡില്‍ പുഷ്പഗിരി ജങ്ഷനു സമീപം ഇന്നലെ പകല്‍ മൂന്നുമണിക്കാണ് അപകടം. കട്ടപ്പനയില്‍ നിന്നും വന്ന സ്വകാര്യ ബസ് ഒട്ടോറിക്ഷയെ മറികടന്ന് എത്തവേ ടവേരയില്‍ ഇടിക്കുകയായിരുന്നു. ബസിന്റെ മുന്‍ഭാഗത്താണ് ഇടിച്ചത്. ഇടിയുടെ ആഘാതത്തില്‍ ടവേര പുര്‍ണമായും തകര്‍ന്നു. നാട്ടുകാരും ബസ് യാത്രക്കാരുമാണു രക്ഷാപ്രവര്‍ത്തനം നടത്തിയത്. ബസിന്റെ ഡ്രൈവറാണു പരുക്കേറ്റവരെ ആദ്യം ആശുപത്രിയില്‍ എത്തിച്ചത്. നാലുപേര്‍ തല്‍ക്ഷണം മരിച്ചു. ഒന്നര വയസുള്ള ഇവാന്‍ ആശുപത്രിയിലേക്കുള്ള വഴി മധ്യേയാണ് മരിച്ചത്. ഇടുക്കി എം. പി ജോയ്‌സ് ജോര്‍ജ്ജ് അടക്കമുള്ള ജനപ്രതിനിധികള്‍ ആശുപത്രിയിലെത്തിയിരുന്നു.