ആനക്കര: പാലക്കാട് കത്തുന്നു നടില്‍ കഴിഞ്ഞ പാടങ്ങള്‍ കരിഞ്ഞുണങ്ങുന്നു. നെല്ലറയുടെ നാടായ പാലക്കാട് നേരിടാന്‍ പോകുന്നത് ജില്ല കണ്ട ഏറ്റവും വലിയ കൃഷിനാശം. പാലക്കാട് ജില്ലയുടെ പട്ടാമ്പി ഉള്‍പ്പെടുന്ന പടിഞ്ഞാറന്‍ മേഖലയിലാണ് ഓണത്തിന് മുന്‍മ്പും ഓണത്തിന് ശേഷവും നടില്‍ പൂര്‍ത്തിയാക്കിയത്. തുടക്കത്തില്‍ തന്നെ മഴ ലഭിക്കാത്ത പ്രശ്‌നം കര്‍ഷകരെ അലട്ടിയിരുന്നു എന്നാല്‍ പിന്നീട് ചെറിയ ഇടമഴ ലഭിച്ചതോടെ കര്‍ഷകര്‍ രണ്ടും കല്‍പ്പിച്ച പാടത്തോക്ക് ഇറങ്ങുകയായിരുന്നു.
ബാങ്കില്‍ നിന്ന് വായ്പ്പയെടുത്തും സ്വര്‍ണ്ണപണയപ്പെടുത്തിയും സ്വകാര്യ ധനകാര്യ സ്ഥാപനങ്ങളില്‍ ലോണുകളും മറ്റും തരപ്പെടുത്തിയാണ് പലരും പ്രതീക്ഷയോടെ ചിങ്ങപ്പുലരിയില്‍ നടില്‍ നടത്തിയത്.എന്നാല്‍ നടില്‍ കഴിഞ്ഞ് ആഴ്ച്ചകള്‍ കഴിഞ്ഞതോടെ പാടശേഖരത്ത് നിന്നുളള വെളളം വറ്റി തുടങ്ങി ഇതോടെ കര്‍ഷകര്‍ വെളളത്തിനായി പരക്കം പാച്ചില്‍ തുടങ്ങി.
ഇന്നും പെയ്യും നാളെ പെയ്യും എന്ന തരത്തില്‍ മഴമേഘങ്ങള്‍ വട്ടമിട്ടപ്പോള്‍ കര്‍ഷകരും പ്രതീക്ഷയിലായിരുന്നു എന്നാല്‍ ചിങ്ങവും കഴിഞ്ഞ് കന്നിയും അവസാനഘട്ടത്തിലേക്ക് കടന്നതോടെ മഴയെത്തിയില്ല. പാടങ്ങള്‍ വറ്റി വരളാനും തുടങ്ങി. പല കര്‍ഷകരു കിണറുകളില്‍ നിന്നും മറ്റ് ജലാശയങ്ങളില്‍ നിന്നും പാടശേഖരത്തിലേക്ക് വെളളം എത്തിക്കുന്നുണ്ടെങ്കിലും ശക്തമായ വെയിലേറ്റ് വെളളം വറ്റി പോകുകയാണ് ചെയ്യുന്നത്.പതിനായിരങ്ങളും ലക്ഷങ്ങളും ചിലവഴിച്ച് ചെറുതും വലുതുമായി പാടശേഖരത്ത് കൃഷിയിറക്കിയ കര്‍ഷകര്‍ ഇപ്പോള്‍ ആത്മഹത്യയുടെ വക്കിലാണ്.
ആനക്കര,കൂറ്റനാട്,തൃത്താല, പരുതൂര്‍,പട്ടാമ്പി,ചാലിശ്ശേരി ,കപ്പൂര്‍,പട്ടിത്തറ ഉള്‍പ്പെടെയുളള പാടശേഖരങ്ങളില്‍ നടില്‍ നടത്തിയ പാടങ്ങളില്‍ കട്ടവിണ്ടുതുടങ്ങി കഴിഞ്ഞു.ഈ മേഖലയിലെ വര്‍ഷങ്ങളായി തരിശിട്ട് ഏക്കര്‍ കണക്കിന് പാടശേഖരങ്ങള്‍ ഇത്തവണയും കര്‍ഷകകൂട്ടായ്മ,ഫെയിസ് ബുക്ക് കൂട്ടായ്മ,കുടുംബശ്രി എന്നിവയുടെ നേത്യത്വത്തില്‍ കൃഷിയിറക്കിയിരുന്നു ഇവരും കടക്കെണിയിലേക്ക് നീങ്ങുകയാണ്.
ഇതിന് പുറമെ നടില്‍ നടത്താനായി ഞാറ്റടി തയ്യാറാക്കിയവരും ഞാറ്റടികളില്‍ വെളളമില്ലാത്തതിനാല്‍ ഉണങ്ങി കൊണ്ടിരിക്കുകയാണ്.ഒരാഴ്ച്ചയ്ക്കുളളില്‍ മഴ ലഭിച്ചില്ലങ്കില്‍ ഇപ്പോള്‍ നിലവില്‍ കുറച്ച് വെളള മുളള പാടങ്ങളിലും കട്ടവിളളാന്‍ തുടങ്ങും ഇതോടെ നെല്ലറയുടെ നാട്ടിലെ നൂറ് കണക്കിന് കര്‍ഷകര്‍ കടുത്ത പ്രതിസന്ധിയിലേക്കും നീങ്ങുകയും ചെയ്യും.
കടുത്ത ജലക്ഷാമം മൂലം നെല്ല് കരിഞ്ഞ് പോയ കര്‍ഷകര്‍ക്ക് അടിയന്തരി സഹായം ലഭ്യമാക്കാന്‍ സര്‍ക്കാര്‍ തയ്യാറാകണമെന്നാണ് കര്‍ഷകര്‍ ആവശ്യപ്പെടുന്നത്.