കാസര്‍കോട്: പച്ചക്കറി ലോറിയില്‍ കടത്തുകയായിരുന്ന ആറു ലക്ഷം രൂപയുടെ പാന്‍ ഉല്‍പന്നങ്ങള്‍ പിടികൂടി. മംഗളൂരുവില്‍ നിന്നു കാഞ്ഞങ്ങാട്ടേക്ക് പച്ചക്കറിയുമായി വരുകയായിരുന്ന ലോറിയില്‍ നിന്നാണ് കാസര്‍കോട് പൊലിസ് ലഹരിവസ്തുക്കള്‍ പിടികൂടിയത്.

സംഭവത്തില്‍ മൂന്നു പേരെ പൊലിസ് അറസ്റ്റ് ചെയ്തു. കാസര്‍കോട് സി.ഐ അബ്ദുര്‍ റഹീമിന് ലഭിച്ച രഹസ്യ വിവരത്തെ തുടര്‍ന്നാണ് ടൗണ്‍ എസ.ഐ വരുണ്‍ ജി കൃഷ്ണ, പൊലിസുകാരായ ഗോകുല്‍, നാരായണന്‍, പ്രദീപ് എന്നിവരുടെ നേതൃത്വത്തില്‍ കറന്തക്കാട്ട് വച്ച് ലോറി തടഞ്ഞ് നിര്‍ത്തി ലഹരി ഉല്‍പന്നങ്ങള്‍ പിടിച്ചെടുത്തത്.

ലോറി ഡ്രൈവര്‍ വിദ്യാനഗര്‍ ബെദിര സ്വദേശി സൈനുദ്ദീന്‍ (53), അടുക്കത്ത്ബയല്‍ സ്വദേശി നവീന്‍ കുമാര്‍ (38), പാറക്കട്ട സ്വദേശി രതീഷ് (30) എന്നിവരാണ് അറസ്റ്റിലായത്. ലോറിയും കസ്റ്റഡിയിലെടുത്തു.