കോട്ടയം: നഗരമധ്യത്തില്‍ പൊലിസ് നോക്കി നില്‍ക്കെ ഗുണ്ടാ വിളയാട്ടം.ഇന്നലെ വൈകിട്ട് ഏഴരയോടെ കോട്ടയം ടി.ബി റോഡിലാണ് സംഭവം.
കെ.എസ്.ആര്‍.ടി.സിക്ക് സമീപം ഷാജിയുടെ ഉടമസ്ഥതയിലുള്ള ബേക്കറിയില്‍ ഇരുപതംഗസംഘം അതിക്രമിച്ചു കയറുകയായിരുന്നുവെന്ന് കടയിലുള്ളവര്‍ പറഞ്ഞു. അക്രമത്തില്‍ ഷാജിക്കും കടയിലുണ്ടായിരുന്ന ജയിസിനും പരുക്കേറ്റു.
ഷാജിയുടെ പുറത്തും കാലിനുമാണ് പരുക്കേറ്റിരുന്നത്. ഇവര്‍ ബേക്കറിയിലെ സോഡാക്കുപ്പികള്‍ റോഡിലെറിഞ്ഞു പൊട്ടിച്ചതോടെ സമീപത്തുള്ളവരും പരിഭ്രാന്തരായി.
ഉടന്‍ തന്നെ വിവരമറിഞ്ഞ് വന്‍ പൊലിസ് സന്നാഹം സ്ഥലത്തെത്തിയെങ്കിലും പ്രതികളെ പിടികൂടാനായില്ല. വെള്ളിയാഴ്ച്ച വൈകിട്ടുണ്ടായ തര്‍ക്കമാണ് അക്രമത്തിന് കാരണം.
കടയുടെമുന്‍പില്‍ ഒരുസംഘം വാചനം പാര്‍ക്ക് ചെയ്തത് കടയുടമ ചോദ്യം ചെയ്തിരുന്നു. ഇതേ തുടര്‍ന്ന് വാക്കു തര്‍ക്കമുണ്ടായി. തുടര്‍ന്ന് കോട്ടയം വെസ്റ്റ് പൊലിസ് സ്റ്റേഷനില്‍ കടയുടമ ഷാജി പരാതി നല്‍കിയിരുന്നു. ഇതിന്റെ പ്രതികാരമായാണ് ഇന്നലെ ഇരുപതംഗസംഘം കടയിലേക്ക് അപ്രതീക്ഷിതമായി കയറി സാധനങ്ങള്‍ തകര്‍ക്കുകയും ഉടമയെ മര്‍ദ്ദിക്കാന്‍ ശ്രമിച്ചതും.
കോട്ടയം കെ.എസ്.ആര്‍.ടി.സിക്ക് സമീപം പൊലിസ് ഉണ്ടെങ്കിലും ഇവരെ തിരിച്ചറിയാനോ പിടികൂടാനോ കഴിഞ്ഞിരുന്നില്ല. റോഡില്‍ കുപ്പിച്ചില്ലുകള്‍ പരന്നതോടെ യാത്രക്കാരും ഇരുവശങ്ങളിലേക്ക് ഓടി. വാഹന ഗതാഗതം തടസപ്പെട്ടു.
പിന്നീട് പൊലിസ് എത്തിയാണ് ഗതാഗത തടസം നീക്കിയത്. അക്രമികള്‍ പോയതോടെ തടിച്ചുകൂടിയ ജനക്കൂട്ടത്തെ പിരിച്ചു വിടാന്‍ പൊലിസ് പ്രയാസപ്പെട്ടു.
ഇതിനിടയില്‍ വെറുതെ നിന്നവരെയും സാക്ഷിയാക്കുവാനുള്ള പൊലിസ് നടപടി പ്രതിഷേധത്തിനിടയാക്കി.സംഭവമെന്തെന്നറിയാന്‍ എത്തിയ യാത്രക്കാരെയെല്ലാം പിടികൂടി സാക്ഷിയാകാന്‍ ഒരു പൊലിസുകാരന്‍ നിര്‍ബന്ധിച്ചെന്നും ഒരു യാത്രക്കാരന്‍ വ്യക്തമാക്കി.
കട്ടവനെ കിട്ടിയില്ലെങ്കില്‍ കിട്ടിയവനെ കള്ളനാക്കുന്ന പൊലിസ് നയമായിരുന്നു സംഭവ സ്ഥലത്ത് അരങ്ങേറിയത്.തടിച്ചുകൂടിയ പൊതുജനങ്ങളെ സാക്ഷിയാണെന്ന് പറഞ്ഞ് വിരട്ടുകയായിരുന്നു ഇവര്‍.