കൊല്‍ക്കത്ത: ജമ്മു- കശ്മിരിനെതിരായ രഞ്ജി പോരാട്ടം കേരളത്തിന്റെ വരുതിയില്‍. രണ്ടാം ദിനം മഴ കളി മുടക്കിയപ്പോള്‍ മൂന്നാം ദിനത്തില്‍ കേരളത്തിന്റെ പോരാട്ടം 306റണ്‍സില്‍ അവസാനിച്ചു. സഞ്ജു സാംസണ്‍ 154 റണ്‍സുകളെടുത്ത് കരുത്തോടെ നിന്നതാണ് കേരളത്തിനു തുണയായത്. മറുപടി ബാറ്റിങ് തുടങ്ങിയ ജമ്മു മൂന്നാം ദിനം കളി നിര്‍ത്തുമ്പോള്‍ അഞ്ചു വിക്കറ്റ് നഷ്ടത്തില്‍ 106 റണ്‍സെന്ന നിലയില്‍ പതറുന്നു. ഒരു ദിവസവും അഞ്ചു വിക്കറ്റും കൈയിലിരിക്കേ അവര്‍ക്ക് കേരളത്തിന്റെ സ്‌കോറിനൊപ്പമെത്താന്‍ 200 റണ്‍സ് കൂടി വേണം. കേരളത്തിനായി അതിഥി താരം ഇഖ്ബാല്‍ അബ്ദുല്ല മൂന്നും മോനിഷ് രണ്ടും വിക്കറ്റെടുത്തു. ഒരു ദിവസം മാത്രം ശേഷിക്കേ മത്സരം സമനിലയില്‍ അവസാനിക്കാനാണ് സാധ്യത.