തിരുവനന്തപുരം : 123 വില്ലേജുകള്‍ പരിസ്ഥിതി ലോല പ്രദേശമാണെന്ന് സര്‍ക്കാര്‍ ഹൈക്കോടതിയില്‍ സത്യവാങ്മൂലം നല്‍കിയത് ഗുരുതരവീഴ്ചയും, കേരളത്തിന്റെ താത്പര്യങ്ങള്‍ക്ക് എതിരുമാണെന്ന് പ്രതിപക്ഷനേതാവ് രമേശ് ചെന്നിത്തല പറഞ്ഞു. സര്‍ക്കാര്‍ നടപടി കര്‍ഷകരോടുള്ള കടുത്ത വഞ്ചനയാണ്. സംഭവം കര്‍ഷകരെയാകെ ആശങ്കയിലാഴ്ത്തിയിരിക്കുകയാണ്. കഴിഞ്ഞ യു.ഡി.എഫ്. സര്‍ക്കാര്‍ ഈ വില്ലേജുകള്‍ പരിസ്ഥിതിലോല പ്രദേശമല്ലെന്ന് കാണിച്ച് കസ്തുരിരംഗന്‍ കമ്മിഷനെ ബോധ്യപ്പെടുത്തി നോട്ടിഫിക്കേഷന്‍ ഇറക്കുകയും, കേന്ദ്രസര്‍ക്കാര്‍ ഇത് അംഗീകരിക്കുകയും ചെയ്തതാണ്. ഇക്കാര്യങ്ങള്‍ പഠിക്കാതെ ഇത്തരത്തില്‍ ഒരു സത്യവാങ്മൂലം നല്‍കിയത് എന്തിനെന്ന് മനസ്സിലാകുന്നില്ല. അതുകൊണ്ട്തന്നെ സംസ്ഥാന സര്‍ക്കാര്‍ തങ്ങള്‍ക്ക് പറ്റിയ വീഴ്ച മനസ്സിലാക്കി സത്യവാങ്മൂലം ഉടന്‍ പിന്‍വലിക്കണമെന്ന് പ്രതിപക്ഷ നേതാവ് സര്‍ക്കാരിനോട് ആവശ്യപ്പെട്ടു.