മമ്പുറം: മതസൗഹാര്‍ദവും രാജ്യസ്‌നേഹവും പുതുതലമുറയില്‍ ഇല്ലാതാവുന്ന പുതിയ സാഹചര്യത്തില്‍ മമ്പുറം തങ്ങളുടെ ജീവിതം ഉന്നതഗവേഷണങ്ങള്‍ക്കു വിധേയമാക്കണമെന്നും സ്‌കൂള്‍ പാഠപുസ്തകങ്ങളിള്‍ ഉള്‍പ്പെടുത്തണമെന്നും കേരള വഖ്ഫ് ബോര്‍ഡ് ചെയര്‍മാന്‍ പാണക്കാട് സയ്യിദ് റശീദലി ശിഹാബ് തങ്ങള്‍. മമ്പുറം നേര്‍ച്ചയുടെ ഏഴാം ദിനമായ ഇന്നലെ മമ്പുറത്തു നടന്ന പ്രാര്‍ഥനാ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. നമ്മുടെ നാട് കൊള്ളയടിക്കുകയും ജനങ്ങളെ പീഡിപ്പിക്കുകയും ചെയ്ത ബ്രിട്ടീഷുകാര്‍ക്കെതിരേ അദ്ദേഹം ജനകീയ മുന്നേറ്റമുണ്ടാക്കി. ചൂഷണങ്ങള്‍ക്കെതിരേ നാനാജാതി മതസ്ഥരെയും സംഘടിപ്പിച്ചിരുന്നുവെന്നും തങ്ങള്‍ പറഞ്ഞു. ഇന്നു രാവിലെ 9.30 നു പാണക്കാട് സയ്യിദ് ഹൈദരലി ശിഹാബ് തങ്ങള്‍ അന്നദാനം ഉദ്ഘാടനം ചെയ്യും.