വളാഞ്ചേരി: 12 വയസുകാരിയെ നിരന്തരം പീഡിപ്പിച്ച 42കാരന്‍ പൊലിസ് പിടിയിലായി. കോഴിക്കോട് നടക്കാവ് സ്വദേശി കൊളങ്ങരത്ത് മീത്തേല്‍ സുധീഷിനെയാണു വളാഞ്ചേരി സി.ഐയും സംഘവും അറസ്റ്റ് ചെയ്തത്. ഏഴാംക്ലാസ്  വിദ്യാര്‍ഥിനിയായ 12 വയസുകാരിയെയാണു പ്രതി നിരന്തരമായി പീഡിപ്പിച്ചുവന്നിരുന്നത്.  കുടുംബ സുഹൃത്തായ പ്രതി പെണ്‍കുട്ടിയെ അഞ്ചാം ക്ലാസ് മുതല്‍ പീഡിപ്പിച്ചു വരികയായിരുന്നു. പഠനത്തില്‍ പിറകോട്ടു പോയ വിദ്യാര്‍ഥിയോട്  അധ്യാപകര്‍ കാര്യങ്ങള്‍ ചോദിച്ചപ്പോഴാണു പീഡനകഥ പുറംലോകമറിയുന്നത്. രക്ഷിതാക്കളില്ലാത്ത സമയം നോക്കി വിദ്യാര്‍ഥിനിയെ പ്രതി പീഡിപ്പിക്കുകയായിരുന്നു.  രക്ഷിതാക്കളോടു പറയരുതെന്നു പറഞ്ഞു പ്രതി കുട്ടിയെ ഭീഷണിപ്പെടുത്തുകയായിരുന്നു. കൂലിപ്പണിക്കാരനാണ് അറസ്റ്റിലായ  സുധീഷ്. പോക്‌സോ നിയമപ്രകാരമാണു കേസ്. പ്രതിയെ തിരൂര്‍ കോടതി റിമാന്‍ഡ് ചെയ്തു. അന്വേഷണ സംഘത്തില്‍ വളാഞ്ചേരി സി.ഐ കെ.എം സുലൈമാന്‍, എ.എസ്.ഐ രാജന്‍, സി.പി ഇഖ്ബാല്‍, സി.പി.ഒമാരായ സുനില്‍ദേവ്, ശറഫുദ്ധീന്‍ എന്നിവരുണ്ടായിരുന്നു.