തിരുവനന്തപുരം: ബി.ജെ.പി തെരഞ്ഞെടുപ്പ് യോഗത്തില്‍ പ്രസംഗിക്കുന്നതിനിടെ കേരളത്തെ സൊമാലിയയോട് ഉപമിച്ചതിനെതിരെ പ്രതിഷേധവുമായി മുഖ്യമന്ത്രി ഉമ്മന്‍ചാണ്ടി. സൊമാലിയയോട് ഉപമിച്ച മോദി സംസ്ഥാനത്തെ അപമാനിച്ചുവെന്ന് ഉമ്മന്‍ചാണ്ടി പറഞ്ഞു. സ്വന്തം പദവി താഴ്ത്തിക്കെട്ടിയാണ് പ്രധാനമന്ത്രി ഇത്തരമൊരു പ്രസ്താവന നടത്തിയത്. നാളെ കേരളത്തിലെത്തുമ്പോള്‍ വാസ്തവ വിരുദ്ധമായ പ്രതികരണങ്ങള്‍ പിന്‍വലിക്കണമെന്നും മുഖ്യമന്ത്രി പത്രക്കുറിപ്പിലൂടെ ആവശ്യപ്പെട്ടു. തിരുവനന്തപുരത്ത് പ്രസംഗിക്കുന്നതിനിടെയാണ് മോദി വിവാദ പരാമര്‍ശം ഉന്നയിച്ചത്. ശിശുമരണ നിരക്കില്‍ കേരളം സൊമാലിയയ്ക്കും പിറകിലാണെന്നായിരുന്നു മോദിയുടെ ആരോപണം. മോദി നാളെയും പ്രചാരണ പരിപാടിക്കായി കേരളത്തിലെത്തുന്നുണ്ട്. പേരാവൂരില്‍ കുട്ടികള്‍ പഴകിയ ആഹാരം കഴിച്ചെന്ന വാര്‍ത്ത തെറ്റാണ്. പട്ടിക വര്‍ഗ ഡയറക്ടര്‍ ഇക്കാര്യം അന്വേഷിച്ച് റിപ്പോര്‍ട്ട് നല്‍കിയതാണെന്നും മുഖ്യമന്ത്രി പറഞ്ഞു.