പെരുമ്പാവൂര്‍: ഹിന്ദി ദിനാചരണത്തോടനുബന്ധിച്ച് വായ്ക്കര സര്‍ക്കാര്‍ യു.പി സ്‌കൂളില്‍ 'ഹിന്ദി ഉത്സവ്' സംഘടിപ്പിച്ചു. പി.ടി.എ. പ്രസിഡന്റ് സി.എ.രാജന്‍ അധ്യക്ഷത വഹിച്ച ചടങ്ങില്‍ പ്രധാനധ്യാപിക പി.വി രമണി ആഘോഷങ്ങളുടെ ഔപചാരികമായ ഉദ്ഘാടനം നടത്തി. സര്‍വ ശിക്ഷാ അഭിയാന്‍ കൂവപ്പടി ബ്ലോക്ക് റിസോഴ്‌സ് സെന്റര്‍ ട്രെയിനര്‍ കെ.എം.ആരിഫ ഹിന്ദി ക്ലബ്ബ് ഉദ്ഘാടനം നിര്‍വ്വഹിച്ചു.
സീനിയര്‍ അസിസ്റ്റന്റ് വി.കെ.ജയമോള്‍ ആശംസാപ്രസംഗം നടത്തി. ഹിന്ദി ക്ലബ്ബ് സെക്രട്ടറി ശ്രുതി ബാല മനോജ് സ്വാഗതവും ഹിന്ദി അധ്യപകന്‍ കെ.ആര്‍.സുരേഷ് നന്ദിയും പറഞ്ഞു. എല്‍.പി., യു.പി വിഭാഗം വിദ്യാര്‍ഥികള്‍ക്കായി കവിത, സംഘഗാന മത്സരങ്ങള്‍ നടന്നു. ഏഴാം ക്ലാസ് വിദ്യാര്‍ഥികള്‍ അവതരിപ്പിച്ച ഏകാങ്കവും പ്രത്യേക ശ്രദ്ധയാകര്‍ഷിച്ചു. സ്‌കൂള്‍ അങ്കണത്തില്‍ വച്ചു നടന്ന ചടങ്ങുകള്‍ക്ക് വിദ്യാര്‍ഥികളും അധ്യാപകരും ബി.ആര്‍.സി. ക്ലസ്റ്റര്‍ കോര്‍ഡിനേറ്റര്‍മാരായ എം.ജെ.ധീര, വി.വി.പ്രിയാകുമാരി എന്നിവരും സന്നിഹിതരായിരുന്നു.