മണ്ണഞ്ചേരി : സ്ത്രീകളടക്കം നിരവധി യാത്രികര്‍ സഞ്ചരിക്കുന്ന റെയില്‍വേ സ്റ്റേഷന്‍ പരിസരം കാടുകയറിയതിനെതുടര്‍ന്ന് നാട്ടുകാരായ യുവാക്കള്‍ ചേര്‍ന്ന് വൃത്തിയാക്കി. കലവൂര്‍ റെയില്‍വേ സ്റ്റേഷന്‍ പരിസരമാണ് ഇന്നലെ രാവിലെ 10 മണിമുതല്‍ പതിനഞ്ചോളം വരുന്ന ചെറുപ്പക്കാര്‍ചേര്‍ന്ന് മനോഹരമാക്കിയത്.
സ്‌റ്റേഷന് തെക്കുഭാഗത്തുള്ള യാത്രക്കാര്‍ എത്തുന്നവഴിയാണ് വര്‍ഷങ്ങളായി കാടുകയറിയനിലയില്‍ തുടര്‍ന്നത്. ഇവിടെയെത്തുന്ന യാത്രികര്‍ രാത്രിയില്‍ ഇഴജന്തുക്കളെ ഭയന്നാണ് സ്‌റ്റേഷന്‍ഫ്‌ളാറ്റുഫോം വിടുന്നത്. യാത്രക്കാര്‍ റയില്‍വേ അധികൃതര്‍ക്ക് നിരന്തരമായി പരാതികള്‍ നല്‍കിയെങ്കിലും ആരും തിരിഞ്ഞുനോക്കിയിരുന്നില്ല.
ഇതറിഞ്ഞാണ് യാവാക്കളുടെ സംഘം കാടുകള്‍ അരിഞ്ഞുതള്ളിയത്. പൊതുജനസേവകരായ യുവാക്കള്‍ക്ക് സമീപവാസിയായ കുടുംബം പൊറോട്ടയും ചിക്കന്‍കറിയും നല്‍കിയാണ് സല്‍പ്രവൃത്തിയെ പ്രോല്‍സാഹിപ്പിച്ചത്.