ലക്‌നോ: സമാജ് വാദി പാര്‍ട്ടിക്ക് വോട്ടു ചെയ്ത് മുസ്‌ലിംകള്‍ വോട്ട് പാഴാക്കരുതെന്ന് ബി.എസ്.പി നേതാവ് മായാവതി. ഇന്നലെ ലക്‌നോയില്‍ സംഘടിപ്പിച്ച റാലിയില്‍ സംസാരിക്കുകയായിരുന്നു അവര്‍. സമാജ് വാദി പാര്‍ട്ടിക്കു പുറമെ ബി.ജെ.പിയേയും ഉന്നം വച്ച് ശക്തമായ ഭാഷയിലാണ് മായാവതി വിമര്‍ശനം ഉന്നയിച്ചത്.
കേന്ദ്രം ഭരിക്കുന്ന ബി.ജെ.പി സര്‍ക്കാര്‍ ന്യൂനപക്ഷങ്ങള്‍ക്കും പിന്നോക്ക വിഭാഗക്കാര്‍ക്കും എതിരായിട്ടാണ് പ്രവര്‍ത്തിക്കുന്നത്. അലിഗഡ് സര്‍വകലാശാലക്കും ജാമിയ മില്ലിയ ഇസ്‌ലാമിയക്കും നല്‍കിയ ന്യൂനപക്ഷ പദവിക്കെതിരായി ബി.ജെ.പി പ്രവര്‍ത്തിച്ചത് അവരുടെ ന്യൂനപക്ഷ വിരുദ്ധ നിലപാടിനുള്ള തെളിവാണെന്നും മായാവതി ആരോപിച്ചു.
വര്‍ഗീയ നിലപാടുകള്‍ ശക്തി പ്രാപിക്കുകയും ലൗ ജിഹാദിന്റെ പേരില്‍ മുസ്‌ലിങ്ങളെ ടാര്‍ഗറ്റ് ചെയ്യുന്ന നിലപാടാണ് കേന്ദ്ര സര്‍ക്കാറിന്റെ ഭാഗത്തു നിന്നും ഉണ്ടാകുന്നതെന്നും അവര്‍ ആരോപിച്ചു.  ബി.ജെ.പിക്ക് ബദലാകാന്‍ കോണ്‍ഗ്രസിന് ഒരിക്കലും കഴിയില്ലെന്നതുകൊണ്ട് അവരേയും ഒഴിച്ചു നിര്‍ത്തുകയാണ് വേണ്ടതെന്നും മായാവതി കൂട്ടിച്ചേര്‍ത്തു.