പ്രിസ്റ്റണ്‍: ബ്രിട്ടനിലെ പുതിയ സിറോ മലബാര്‍ രൂപതയുടെ പ്രഥമ മെത്രാനായി മാര്‍ ഡോ. ജോസഫ് സ്രാമ്പിക്കല്‍ അഭിഷിക്തനായി. രൂപതാ ആസ്ഥാനമായ പ്രിസ്റ്റണിലെ സെന്റ് അല്‍ഫോന്‍സാ കത്തീഡ്രലിനു സമീപമുള്ള നോര്‍ത്ത് എന്‍ഡ് ഫുട്‌ബോള്‍ സ്റ്റേഡിയത്തിലായിരുന്നു ചടങ്ങ്. മേജര്‍ ആര്‍ച്ച്ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരി മുഖ്യകാര്‍മികത്വം വഹിച്ചു. ലങ്കാസ്റ്റര്‍ രൂപത ബിഷപ് ഡോ. മൈക്കിള്‍ കാംബെല്‍, പാലാ രൂപതാധ്യക്ഷന്‍ മാര്‍ ജോസഫ് കല്ലറങ്ങാട്ട് എന്നിവര്‍ സഹകാര്‍മികരായി. ബ്രിട്ടനിലെ വത്തിക്കാന്‍ പ്രധിനിധി ആര്‍ച്ച്ബിഷപ് ഡോ. അന്റോണിയോ മെന്നിനി അനുഗ്രഹ സന്ദേശം നല്‍കി.  
ചങ്ങനാശേരി ആര്‍ച്ച്ബിഷപ് മാര്‍ ജോസഫ് പെരുന്തോട്ടം, കോട്ടയം ആര്‍ച്ച്ബിഷപ് മാര്‍ മാത്യു മൂലക്കാട്ട്, ഷിക്കാഗോ ബിഷപ് മാര്‍ ജേക്കബ് അങ്ങാടിയത്ത്, ഇരിങ്ങാലക്കുട ബിഷപ് മാര്‍ പോളി കണ്ണൂക്കാടന്‍, ഉജ്ജയിന്‍ ബിഷപ് മാര്‍ സെബാസ്റ്റ്യന്‍ വടക്കേല്‍, സീറോ മലങ്കര സഭയെ പ്രതിനിധീകരിച്ചു ഫാ. ഡാനിയേല്‍ കുളങ്ങര, ഫാ. തോമസ് മടുക്കമൂട്ടില്‍ തുടങ്ങിയവര്‍ സംബന്ധിച്ചു.