മുക്കം: പുലിനഖവും കരടിനെയ്യും വ്യാജമരുന്നുകളുമായി കര്‍ണാടക സ്വദേശി പ്രഭുദേവ് മുക്കത്ത് പിടിയിലായി. ഇന്നലെ ഉച്ചയ്ക്ക് രണ്ടോടെ ടൗണില്‍ വില്‍പന നടത്തുന്നതിനിടെ ഇയാളെ രഹസ്യാന്വേഷണ വിഭാഗം ഉദ്യോഗസ്ഥന്‍ പ്രദീപാണ് പിടികൂടിയത്. പുലിനഖത്തിന് 1000 രൂപ വീതവും കരടിനെയ്യിന് 500 രൂപ വീതവും വില പറഞ്ഞായിരുന്നു വില്‍പന.
സംശയം തോന്നിയ നാട്ടുകാരാണ് പൊലിസില്‍ വിവരമറിയിച്ചത്. ഇയാളില്‍ നിന്ന് രണ്ട് പുലിനഖം, കരടിനെയ്യ്, നിരവധി വ്യാജമരുന്നുകള്‍ എന്നിവ പൊലിസ് പിടിച്ചെടുത്തു. കൂടുതല്‍ അന്വേഷണത്തിനായി പ്രതിയെ വനംവകുപ്പിനു കൈമാറി. അന്തര്‍ സംസ്ഥാന മാഫിയയുമായി ഇയാള്‍ക്ക് ബന്ധമുണ്ടോയെന്നും പൊലിസ് അന്വേഷിക്കുന്നുണ്ട്.