നേമം: കാരയ്ക്കാമണ്ഡപത്തിനു സമീപം തുലവിളയില്‍ വച്ച് ദിവസങ്ങള്‍ക്ക് മുന്‍പ് നേമം വെളളായണി അന്‍ തസ്ലി വീട്ടില്‍ കബീറിന്റെ മകന്‍ റഫീക്കിനെ (24) നടു റോഡില്‍ വച്ച് അടിച്ചു കൊന്ന കേസിലെ ഏഴു പ്രതികളെ കഴിഞ്ഞദിവസം നേമം പൊലീസ് അറസ്റ്റ് ചെയ്തു.
പുതിയ കാരയ്ക്കാമണ്ഡപം ബി.എന്‍.വി കോംപ്ലക്‌സിനു സമീപം മൈദീന്‍ കണ്ണിന്റെ മകന്‍ ആഷര്‍ (24), പഴയ കാരയ്ക്കാമണ്ഡപം പളളികുളം ലെയ്‌നില്‍ എ.ജെ ഹൗസില്‍ അബുബക്കറുടെ മകന്‍ അബുഷാക്കീര്‍ (33), പഴയ കാരയ്ക്കാമണ്ഡപം താന്നിവിള റംസാന മന്‍സിലില്‍ മാഹീന്റെ മകന്‍ ആരിഫ് (30), പുതിയ കാരയ്ക്കാമണ്ഡപം ശിവന്‍ കോവിലിനു പുറകില്‍ ഹുസൈന്‍ന്റെ മകന്‍ നൗഫല്‍ (23), മണക്കാട് ആറ്റുകാല്‍ ചിറപ്പാലം ബണ്ട് റോഡില്‍ ശിവ ഭവനത്തില്‍ ശശികുമാറിന്റെ മകന്‍ മുഹമ്മദ് മാലിക് (24) , നേമം കാരയ്ക്കാമണ്ഡപം പുത്തന്‍വിളാകം വാഹിദ് മന്‍സിലില്‍ അബ്ദുള്‍ വാഹിദിന്റെ മകന്‍ ഹബീബ് (24), നേമം കാരയ്ക്കാമണ്ഡപം പളളിവിളാകം വീട്ടില്‍ അബ്ദുള്‍ റഹീമിന്റെ മകന്‍ ആഷിക് (23) എന്നിവരാണ് പിടിയിലായത്.
കേസിലെ പ്രധാന പ്രതി അന്‍സക്കീര്‍ ദിവസങ്ങള്‍ക്കു മുന്‍പ് പിടിയിലായിരുന്നു. ഇതോടെ കേസിലെ മുഴുവന്‍ പ്രതികളും പിടിയിലായി.കൃത്യം നടന്ന് ദിവസങ്ങള്‍ക്കുള്ളില്‍ തന്നെ പ്രതികളെ പിടികൂടാനായത് അന്വേഷണ സംഘത്തിന് നേട്ടമായി. അബുഷാക്കീറും കാരയ്ക്കാമണ്ഡപത്തിലെ ഗുണ്ടയുമായ തൗഫീറും തമ്മിലുണ്ടായിരുന്ന വ്യക്തി വൈരാഗ്യമാണ് കൊലപാതകത്തില്‍ കലാശിച്ചത്. തിരുവനന്തപുരം സിറ്റി പൊലിസ് കമ്മിഷണര്‍ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ ഫോര്‍ട്ട് അസി.കമ്മിഷണര്‍ കെ.എസ്.ഗോപകുമാര്‍, നേമം സി.ഐ.ദിലീപ്കുമാര്‍ ദാസ്, എസ്.ഐ.ആര്‍.ശിവകുമാര്‍, എ.എസ്.ഐ മാരായ മാഹീന്‍കണ്ണ്, മുഹമ്മദ് അലി, സിവില്‍ പൊലിസ് ഓഫീസര്‍മാരായ ബിനു, സാബുചന്ദ്രന്‍, സാം ജോസ്, ബിമല്‍മിത്ര എന്നിവരടങ്ങിയ സംഘമാണ് പ്രതികളെ പിടികൂടിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.