പൂച്ചാക്കല്‍: ഓട്ടോസ്റ്റാന്റില്‍ വെച്ച് ഡ്രൈവറെ ആക്രമിച്ച് ഓട്ടോറിക്ഷ തകര്‍ത്ത കേസില്‍ പ്രതി പിടിയില്‍. പൂച്ചാക്കല്‍ തെക്കേക്കര പാസഞ്ചര്‍ ഓട്ടോ സ്റ്റാന്‍ഡിലെ ഡ്രൈവര്‍ പൂച്ചാക്കല്‍ വേലംവെളി സുഭാഷിനാണ് ആക്രമണമേറ്റത്. തിങ്കള്‍ രാത്രിയായിരുന്നു സംഭവം. കേസില്‍ പൂച്ചാക്കല്‍ തേവര്‍വട്ടം പവനനാണ് പിടിയിലായതെന്നു പൂച്ചാക്കല്‍ പൊലീസ് അറിയിച്ചു.
ഓട്ടം കാത്തുകിടക്കുകയായിരുന്ന സുഭാഷിനെ പ്രകോപനങ്ങളില്ലാതെ പ്രതി ആക്രമിക്കുകയായിരുന്നെന്ന് സുഭാഷ് മൊഴിനല്‍കി. ഇരുമ്പുവടിയ്ക്കും കല്ലിനുമായി കൈകാലുകള്‍ക്കും കണ്ണിനും തലയ്ക്കും ആക്രമണമേറ്റ സുഭാഷ് ചേര്‍ത്തല താലൂക്ക് ആശുപത്രിയില്‍ ചികില്‍സയിലാണ്. ഓട്ടോറിക്ഷ തകര്‍ക്കുകയും ആക്രമണം തടയാനെത്തിയവരെയും മര്‍ദിക്കുകയും ചെയ്തതായി പരാതിയുണ്ട്.
സംഭവത്തില്‍ പ്രതിഷേധിച്ച് ഇന്നലെ തെക്കേക്കരയിലെ ഓട്ടോത്തൊഴിലാളികള്‍ പണിമുടക്കു നടത്തി.
പ്രതിയെ ഇന്ന് കോടതിയില്‍ ഹാജരാക്കുമെന്ന് എസ്.ഐ ജി. സുരേഷ്‌കുമാര്‍ പറഞ്ഞു.