ആലപ്പുഴ: ഹയര്‍സെക്കന്‍ഡറി പരീക്ഷയില്‍ മുഴുവന്‍ മാര്‍ക്കും നേടി ഫാത്തിമ നാടിന്റെയും സ്‌കൂളിന്റെയും അഭിമാന താരമായി. ആലപ്പുഴ ലജ്‌നത്തുല്‍ മുഹമ്മദിയ ഹയര്‍സെക്കന്‍ഡറി സ്‌കൂളിലെ ഈ മിടുക്കി പ്ലസ് ടു പരീക്ഷയില്‍ 600 ല്‍ 600 മാര്‍ക്കും നേടിയാണ് ഉജ്വല വിജയം കൈവരിച്ചത്. മിക്കവാറും സയന്‍സ് വിഷയങ്ങള്‍ പഠിക്കുന്ന കുട്ടികള്‍ മാത്രമാണ് ഈ അപൂര്‍വനേട്ടം കൈവരിക്കുന്നത്. ഹ്യുമാനിറ്റീസ് ഗ്രൂപ്പിന് ഫാത്തിമ ലജ്‌നത്തില്‍ ചേരുമ്പോള്‍ തന്നെ മികച്ച നേട്ടം ലക്ഷ്യമിട്ടിരുന്നു. രണ്ടാം ഭാഷയായി അറബിയും തെരഞ്ഞെടുത്തു. ചിട്ടയായ പഠനത്തിലൂടെ അറബി ഉള്‍പ്പെടെ എല്ലാ വിഷയങ്ങള്‍ക്കും 100 ല്‍ 100 മാര്‍ക്കും ഫാത്തിമ നേടി. പഠനത്തോടൊപ്പം എന്‍.എസ്.എസ് പോലുള്ള സേവന മേഖലകളിലും ഫാത്തിമ മികവു കാട്ടിയിരുന്നുവെന്ന് പ്രിന്‍സിപ്പല്‍ റ്റി.എ അഷ്‌റഫ് കുഞ്ഞാശാന്‍ സാക്ഷ്യപ്പെടുത്തുന്നു. ആലപ്പുഴ കുതിരപന്തി വാര്‍ഡില്‍ റഹീം മന്‍സില്‍ അബ്ദുറഹീമിന്റെയും താഹിറയുടെയും മകളാണ് ഫാത്തിമ. വിജയം കൈവരിച്ച മുഴുവന്‍ വിദ്യാര്‍ഥികളേയും സ്‌കൂള്‍ മാനേജര്‍ എ.എം നസീര്‍, പി.ടി.എ. പ്രസിഡന്റ് എ.കെ ഷൂബിയും അഭിനന്ദിച്ചു.