ന്യൂഡല്‍ഹി: ന്യൂസിലന്‍ഡിനെതിരായ ടെസ്റ്റ് പരമ്പര നേട്ടത്തോടെ ഒന്നാം റാങ്ക് ഉറപ്പിച്ച ഇന്ത്യന്‍ ടീമിന് ഐ.സി.സി ടെസ്റ്റ് ചാംപ്യന്‍ഷിപ്പ് ദണ്ഡ് സമ്മാനിച്ചു. ഒന്നാം റാങ്കിലെത്തുന്നവര്‍ക്കു നല്‍കുന്ന ദണ്ഡാണ് ഇന്ത്യ സ്വന്തമാക്കിയത്. ഐ.സി.സിക്കായി മുന്‍ ഇന്ത്യന്‍ നായകന്‍ സുനില്‍ ഗാവസ്‌കറാണ് ദണ്ഡ് കൈമാറിയത്.  
പാകിസ്താനെ മറികടന്നാണ് ഇന്ത്യ റാങ്കിങില്‍ ഒന്നാം സ്ഥാനത്തെത്തിയത്. ന്യൂസിലന്‍ഡിനെതിരായ പരമ്പരയിലെ രണ്ടാം ടെസ്റ്റ് വിജയിച്ചപ്പോള്‍ തന്നെ ഇന്ത്യ ഒന്നാം സ്ഥാനത്തെത്തിയിരുന്നു. എന്നാല്‍ പരമ്പര അവസാനിച്ച ശേഷമാണ് ഐ.സി.സി ഔദ്യോഗികമായി പ്രഖ്യാപിച്ചത്. ഇന്ത്യക്ക് 118 പോയിന്റുകളും പാകിസ്താന് 111 പോയിന്റുമാണുള്ളത്. ആസ്‌ത്രേലിയയാണ് മൂന്നാം റാങ്കില്‍. പത്തു കോടി ഡോളര്‍ സമ്മാനത്തുക ഇന്ത്യക്കു ലഭിക്കും.