വിദഗ്ധര്‍ എത്താന്‍ വൈകിയതില്‍ പ്രതിഷേധം
 ഉറക്കമൊഴിഞ്ഞ് കലക്ടറും ജനപ്രതിനിധികളും

ചെറുവത്തൂര്‍: ദേശീയപാതയില്‍ ചെറുവത്തൂര്‍ ഞാണങ്കൈയില്‍ ടാങ്കര്‍ ലോറി മറിഞ്ഞതിനെ തുടര്‍ന്ന് ആശങ്കയുടെ മുള്‍മുനയില്‍ 13 മണിക്കൂര്‍. തിങ്കളാഴ്ച വൈകുന്നേരം 3.45 ഓടെയാണ് മംഗളൂരുവില്‍ നിന്നും കോഴിക്കോടേക്ക് പാചക വാതകവുമായി പോവുകയായിരുന്ന ലോറി നിയന്ത്രണം വിട്ടു മറിഞ്ഞത്.
ലോറി ഡ്രൈവര്‍ തുറയൂര്‍ സ്വദേശി വിജയകുമാര്‍ നിസാര പരുക്കുകളോടെ രക്ഷപ്പെട്ടു. റോഡരികിലേക്ക്  ലോറി മറിഞ്ഞയുടന്‍ വാഹനത്തില്‍ നിന്നും അപായ മണി മുഴങ്ങി. വാതകചോര്‍ച്ചയുണ്ടാകുമ്പോള്‍ ഉണ്ടാവുന്ന രീതിയിലായിരുന്നു അപായ മണി. ഇതോടെ ജനങ്ങള്‍ പരിഭ്രാന്തരായി. 18 ടണ്‍ ദ്രവീകൃത പെട്രോളിയം ഗ്യാസാണ് ലോറിയിലുണ്ടായിരുന്നത്.  തൃക്കരിപ്പൂരില്‍ നിന്നും അഗ്‌നിശമന സേനയെത്തി വാതക ചോര്‍ച്ചയില്ലെന്ന നിഗമനത്തിലെത്തിയെങ്കിലും ആശങ്കയൊഴിയാന്‍ ചൊവ്വാഴ്ച പുലര്‍ച്ചെ വരെ കാത്തിരിക്കേണ്ടി വന്നു.
ഈ സമയമത്രയും ദേശീയപാതയില്‍ ചെറുവത്തൂരിനും കാലിക്കടവിനും ഇടയില്‍ ഗതാഗതം പൂര്‍ണമായും സ്തംഭിച്ചു. വാഹനങ്ങളെ പടന്ന, തൃക്കരിപ്പൂര്‍ എന്നിവിടങ്ങളിലൂടെയും, ചീമേനി റോഡിലൂടെയും വഴിതിരിച്ചു വിട്ടു. വളപട്ടണത്തില്‍ നിന്ന് ഖലാസിമാരെത്തിയാണ് ചൊവ്വാഴ്ച പുലര്‍ച്ചെ 4.30ഓടെ ടാങ്കര്‍ മറ്റൊരു ലോറിയിലേക്ക് മാറ്റിയത്. എം രാജഗോപാലന്‍ എം.എല്‍.എ, ജില്ലാ കലക്ടര്‍ ജീവന്‍ബാബു, അഡീഷണല്‍ തഹസില്‍ദാര്‍ നാരായണന്‍, ചെറുവത്തൂര്‍ പഞ്ചായത്ത് പ്രസിഡന്റ് മാധവന്‍ മണിയറ, ഡി.വൈ.എസ്.പി കെ. ദാമോദരന്‍, നീലേശ്വരം സി.ഐ ഉണ്ണികൃഷ്ണന്‍, ചന്തേര എസ്.ഐ ഇ.അനൂപ് കുമാര്‍, അഡീഷണല്‍ എസ്.ഐമാരായ ടി.പി ശശിധരന്‍, പത്മനാഭന്‍, രാജന്‍, ഫയര്‍ ഫോഴ്‌സ് ഉദ്യോഗസ്ഥരായ സന്തോഷ് കുമാര്‍.ടി.കെ, ബെന്നി.സി.ടി, മുകേഷ് ഇ.ടി, ചെറുവത്തൂര്‍ പഞ്ചായത്തംഗം നാരായണന്‍ തുടങ്ങിയവരുടെ നേതൃത്വത്തിലാണ് ടാങ്കര്‍ നീക്കുന്നതിനുള്ള ശ്രമങ്ങള്‍ നടന്നത്.
ദേശീയപാതയിലെ സ്ഥിരം അപകട മേഖലയാണ് ടാങ്കര്‍ ലോറി അപകടത്തില്‍ പെട്ട ഞാണങ്കൈ. ഭാഗ്യമൊന്നുകൊണ്ടുമാത്രാണ് ഇവിടെ വലിയൊരു ദുരന്തം വഴിമാറിയത്.
അപകടത്തില്‍പ്പെട്ട ടാങ്കര്‍ ലോറി ഡ്രൈവര്‍ തുറയൂര്‍ സ്വദേശി വിജയകുമാറിനെതിരേ അമിത വേഗതയ്ക്ക് ചന്തേര പൊലിസ് കേസേടുത്തു. ടാങ്കര്‍ ലോറികളില്‍ രണ്ടു ഡ്രൈവര്‍മാര്‍ വേണമെന്ന നിര്‍ദേശവും പാലിച്ചിരുന്നില്ല. ഒരാള്‍ മാത്രമാണ് അപകടത്തില്‍പ്പെട്ട ലോറിയില്‍ ഉണ്ടായിരുന്നത്. ഞാണങ്കൈയിലെ ഹോട്ടലിലെ സി.സി.ടി.വി യില്‍ അപകടത്തിന്റെ ദൃശ്യം വ്യക്തമായി കാണുന്നുണ്ട്. അമിതവേഗതയില്‍ കയറ്റത്തിലേക്ക് കയറുന്നതിനിടെ ലോറി ഇടതു വശത്തേക്ക് വീഴുന്നതായാണ് ദൃശ്യങ്ങളിലുള്ളത്.