തൊടുപുഴ: പോസ്റ്റല്‍ ബാലറ്റ് വിതരണം സംബന്ധിച്ച് ചീഫ് ഇലക്ടറല്‍ ഓഫീസര്‍ നിര്‍ദ്ദേശങ്ങള്‍ പുറപ്പെടുവിച്ചു. സര്‍വ്വീസ് വോട്ടര്‍മാരെക്കൂടാതെ ഇലക്ഷന്‍ ഡ്യൂട്ടിക്ക് നിയോഗിക്കപ്പെട്ടിട്ടുള്ള ഉദ്യോഗസ്ഥര്‍ക്ക് ( പൊലിസ് , ഫയര്‍ഫോഴ്‌സ്, ഹോംഗാര്‍ഡ് ഉള്‍പ്പെടെ) പോസ്റ്റല്‍ ബാലറ്റിന് അര്‍ഹതയുണ്ട്. പൊലിസ് , ഫയര്‍ഫോഴ്‌സ്, ഹോംഗാര്‍ഡ്, മറ്റ് സുരക്ഷാ ഉദ്യോഗസ്ഥരുടെ പോസ്റ്റല്‍ ബാലറ്റ് സംബന്ധിച്ച നടപടിക്രമങ്ങള്‍ കൈക്കൊള്ളേണ്ടത് അതാത് വകുപ്പുകളിലെ ഇതിനായി നിയോഗിച്ചിട്ടുള്ള നോഡല്‍ ഓഫീസര്‍മാരാണ്. പോളിംഗ് ഉദ്യോഗസ്ഥരുടെ രണ്ടാംഘട്ട പരിശീലനത്തിനുള്ള നിയമനക്കത്തിനോടൊപ്പം പോസ്റ്റല്‍ ബാലറ്റിനുള്ള അപേക്ഷാ ഫോമും വിതരണം ചെയ്യും. അത് പൂര്‍ണ്ണമായി പൂരിപ്പിച്ച 12 വരെ നടക്കുന്ന പരിശീലനത്തിന്റെ സമയത്ത് തിരിച്ചേല്‍പ്പിക്കണം. ഇതിനായി പരിശീലന കേന്ദ്രങ്ങളില്‍ വോട്ടര്‍ സഹായ കേന്ദ്രം ഒരുക്കും. ഒരു മുതിര്‍ന്ന ഉദ്യോഗസ്ഥന്റെ ചുമതലയിലായിരിക്കും ഈ കേന്ദ്രം പ്രവര്‍ത്തിക്കുക. 12 വരെ തിരികെ ലഭിക്കുന്ന അപേക്ഷകള്‍ പരിശോധിച്ച് നിയമസഭാ മണ്ഡലത്തിന്റെ അടിസ്ഥാനത്തില്‍ തരം തിരിച്ച് കഴിയുന്നതും അതാത് ദിവസം തന്നെ ബന്ധപ്പെട്ട റിട്ടേണിംഗ് ഓഫീസറുടെ ഓഫീസില്‍ എത്തിക്കും. അപേക്ഷയുടെ അടിസ്ഥാനത്തിലുള്ള പോസ്റ്റല്‍ ബാലറ്റുകള്‍ തൊട്ടടുത്ത ദിവസം തന്നെ പോളിംഗ് ഉദ്യോഗസ്ഥര്‍ക്ക് അയച്ചുകൊടുക്കുന്നതിനുള്ള ഏര്‍പ്പാടുകള്‍ പോസ്റ്റല്‍ ബാലറ്റ് നോഡല്‍ ഓഫീസര്‍മാരുടെ നേതൃത്വത്തില്‍ ചെയ്യും. ആദ്യ പരിശീലന ദിവസങ്ങളില്‍ ലഭിച്ച അപേക്ഷക്കുള്ള പോസ്റ്റല്‍ ബാലറ്റുകള്‍ പരിശീലനത്തിന്റെ അവസാന ദിവസങ്ങളില്‍ പരിശീലന കേന്ദ്രങ്ങളില്‍ വച്ചും വിതരണം ചെയ്യും. ഇങ്ങനെ വിതരണം ചെയ്യുന്ന പക്ഷം വോട്ടര്‍ സഹായ കേന്ദ്രത്തിന്റെ ചുമതലയുള്ള ഓഫീസര്‍, റിട്ടേണിംഗ് ഓഫീസര്‍മാരില്‍ നിന്ന് ലഭിക്കുന്ന പോസ്റ്റല്‍ ബാലറ്റ് അതാത് ഉദ്യോഗസ്ഥര്‍ക്ക് അവരുടെ തെരഞ്ഞെടുപ്പ് തിരിച്ചറിയല്‍ കാര്‍ഡോ മറ്റ് ഏതെങ്കിലും അംഗീകൃത തിരിച്ചറിയല്‍ രേഖയോ പരിശോധിച്ച് ബോധ്യപ്പെട്ടതിനു ശേഷം വിതരണം ചെയ്യുകയും അവരുടെ കയ്യൊപ്പ് രജിസ്റ്ററില്‍ രേഖപ്പെടുത്തി വാങ്ങുകയും ചെയ്യും.