കോഴിക്കോട്: നഗരത്തില്‍ കഞ്ചാവ് എത്തിച്ച് നല്‍കുന്ന മൊത്തവിതരണക്കാരന്‍ പിടിയില്‍. കര്‍ണാടക ബൂന്തല്‍ സ്വദേശി സുനില്‍ ചവാനെയാണ് (20) നടക്കാവ് എസ്.ഐ ഗോപകുമാറും സിറ്റി പൊലിസ് കമ്മിഷണറുടെ കീഴിലുള്ള ഷാഡോ പൊലിസും ചേര്‍ന്നു പിടികൂടിയത്. നഗരത്തില്‍ വിദ്യാഭ്യാസ സ്ഥാപനങ്ങള്‍ കേന്ദ്രീകരിച്ച് കഞ്ചാവ് വില്‍പ്പന നടത്തുന്നവര്‍ക്ക് ഇയാളാണ് കഞ്ചാവ് എത്തിക്കുന്നത്.     
പൊലിസ് പട്രോളിങ്ങിനിടെ എരഞ്ഞിപ്പാലം പാലാട്ടുതാഴം ബസ് സ്റ്റോപ്പിന് സമീപത്തുവച്ച് സംശയാസ്പദമായ സാഹചര്യത്തില്‍ കണ്ട സുനില്‍ ചവാനെ അറസ്റ്റ് ചെയ്യുകയായിരുന്നു. ഇയാളില്‍ നിന്ന് നാലുകിലോ കഞ്ചാവ് കണ്ടെടുത്തു. കര്‍ണാടകയില്‍ നിന്ന് തുച്ഛവിലക്ക് കഞ്ചാവ് വാങ്ങി നഗരത്തില്‍ വില്‍പന നടത്തുന്ന ശൃംഖലയിലെ മുഖ്യകണ്ണിയാണ് ഇയാളെന്ന് പൊലിസ് പറഞ്ഞു. ഇയാളുമായി ബന്ധപ്പെട്ടവരെക്കുറിച്ച് നടക്കാവ് സി.ഐ അഷ്‌റഫിന്റെ നേതൃത്വത്തില്‍ അന്വേഷണം നടത്തിവരികയാണ്. നടക്കാവ് സ്റ്റേഷനിലെ എസ്.ഐ വേണുഗോപാല്‍, എസ്.സി.പി.ഒ ശശികുമാര്‍, ഷാഡോ പൊലിസിലെ സീനിയര്‍ സിവില്‍ പൊലിസ് ഓഫിസര്‍മാരായ മനോജ്, മുഹമ്മദ് ഷാഫി, അബ്ദുറഹ്മാന്‍, സിവില്‍ പൊലിസ് ഓഫിസര്‍മാരായ അഖിലേഷ്, സുനില്‍കുമാര്‍ എന്നിവര്‍ അടങ്ങിയ സംഘമാണ് പ്രതിയെ പിടികൂടിയത്.