തേഞ്ഞിപ്പലം: ചെനക്കലങ്ങാടി കൊളത്തോട് കേന്ദ്രീകരിച്ച് വ്യാജമദ്യം ഒഴുകുന്നതായി ആക്ഷേപം. കൊളത്തോട്, നെച്ചിനാത്തില്‍, വെള്ളായിപ്പാടം, മഞ്ഞക്കാട്  ഭാഗങ്ങളിലാണ് അനധികൃത മദ്യവില്‍പ്പന സജീവമായി നടക്കുന്നത്. രാവിലെയും ഉച്ചയ്ക്കും വൈകുന്നേരങ്ങളിലും വിവിധ സ്ഥലങ്ങളില്‍ നിന്നും ബൈക്കുകളിലാണ് ചില ഏജന്റുമാര്‍ മുഖേന ഇവിടെ മദ്യം എത്തിക്കുന്നത്. ഇവര്‍ എത്തിക്കുന്ന മദ്യം ചില പ്രത്യേക കേന്ദ്രങ്ങളില്‍ വച്ച് ആവശ്യക്കാര്‍ക്ക് കൈമാറുകയാണ് പതിവ്. പ്രദേശത്തുനിന്നു വ്യാജമദ്യ വില്‍പ്പനയ്ക്കിടെ ഒരാള്‍ ദിവസങ്ങള്‍ക്ക് മുമ്പ് എക്‌സൈസ് വകുപ്പിന്റെ പിടിയിലായിരുന്നു. എങ്കിലും ഇതിന്റെ വ്യാപനം തടയാന്‍ സാധിച്ചിട്ടില്ലെന്ന് നാട്ടുകാര്‍ പറയുന്നു. പ്രദേശത്ത് പൊലിസ് പരിശോധന കര്‍ശനമാക്കണമെന്നാണ് നാട്ടുകാരുടെ ആവശ്യം.