തിരൂര്‍: തിരുന്നാവായ റെയില്‍വേ സ്റ്റേഷനു സമീപം താമസിക്കുന്ന സാമൂഹ്യപ്രവര്‍ത്തകനും അബൂദാബി കെ.എം.സി.സി മലപ്പുറം ജില്ലാ മുന്‍ വൈസ് പ്രസിഡന്റും ഇന്‍ജാസ് ഡെവലപ്‌മെന്റ് സൊസൈറ്റി ചെയര്‍മാനുമായ കാളിയാടന്‍ അസീസിന്റെ വീടിനുനേരെ ആക്രമണം. സ്വിഫ്റ്റ് ഡിസൈര്‍ കാറും സൗജന്യ സേവനത്തിനായി ഉപയോഗിക്കുന്ന ആംബുലന്‍സും അക്രമികള്‍ തകര്‍ത്തു.
വീടിന്റെ ജനല്‍ചില്ലുകളും തകര്‍ത്ത നിലയിലാണ്. കഴിഞ്ഞ ദിവസം പുലര്‍ച്ചെയാണ് സംഭവം. കാറിന്റെ ചില്ലുകള്‍ തകര്‍ക്കുന്ന ശബ്ദം കേട്ടു പുറത്തിറങ്ങിയ സമയത്ത് മുഖംമൂടി ധരിച്ചെത്തിയ രണ്ടിലധികം വരുന്ന സംഘം വൈദ്യുതിബന്ധം വിച്ഛേദിച്ച് വടിവാളുകളുമായി അക്രമംനടത്തുകയായിരുന്നെന്നു വീട്ടുകാര്‍ പറയുന്നു.
വിവരമറിയിച്ചതിനെ തുടര്‍ന്ന് തിരൂര്‍ എസ്.ഐ കെ.ആര്‍ രഞ്ജിത്ത് സ്ഥലത്തെത്തി തെരച്ചില്‍ നടത്തിയെങ്കിലും പ്രതികളെ കണ്ടെത്താനായില്ല. അക്രമികളെ കണ്ടെത്താന്‍ പ്രദേശത്തെ സ്വകാര്യ സ്ഥാപനങ്ങളുടെ സി.സി.ടി.വി കാമറ ദൃശ്യങ്ങള്‍ പരിശോധിച്ചെങ്കിലും റെയില്‍വേ പാലത്തിലെ ടോള്‍ പിരിവ് കേന്ദ്രത്തിന് സമീപത്തെ നടവഴിയിലൂടെ എത്തിയ അക്രമികള്‍ മതില്‍ ചാടിക്കടന്നാണ് വീടിന്റെ മുറ്റത്തെത്തിയതെന്നു പൊലിസ് കണ്ടെത്തി.