പയ്യന്നൂര്‍: പെരുമ്പ ലയണ്‍സ് ക്ലബ്ബിന്റെ നേതൃത്വത്തില്‍ നടത്തുന്ന ഫുഡ് ആന്റ് മാംഗോ ഫെസ്റ്റിന് നാളെ പയ്യന്നൂര്‍ നഗരസഭാ സ്റ്റേഡിയത്തില്‍ തുടക്കമാകും. 22 വരെ നീണ്ടു നില്‍ക്കുന്ന ഫെസ്റ്റിന്റെ ഭാഗമായി ഭക്ഷണ വൈവിധ്യത്തോടൊപ്പം വിവിധ കലാപരിപാടികളും അമ്യൂസ്‌മെന്റ് പാര്‍ക്കും ഒരുക്കിയിട്ടുണ്ട്. തലശ്ശേരി ദം ബിരിയാണി, പുയ്യാപ്ല വിഭവങ്ങള്‍, നാട്ടുരുചിയുടെ വൈവിധ്യങ്ങള്‍, തട്ടുകടകള്‍, അറേബ്യന്‍ കോര്‍ണര്‍, ബിരിയാട്ട് ഹട്ട്, കപ്പ കോര്‍ണര്‍ എന്നിവയും ഫെസ്റ്റ് നഗരിയില്‍ ഉണ്ടാകും. രുചിക്കൂട്ടുകളുടെ വൈവിധ്യം കൊണ്ട് ദേശീയ ഭക്ഷ്യമേളയില്‍ ഒന്നാം സ്ഥാനം നേടിയ തലശ്ശേരി ഇത്താത്തമാരുടെ പ്രത്യേക കൗണ്ടര്‍ ഫെസ്റ്റ് നഗരിയിലെ പ്രത്യേകതയാകുമെന്ന് സംഘാടകര്‍ അറിയിച്ചു. വൈകുന്നേരം നാല് മുതല്‍ രാത്രി പത്ത് വരെയാണ് പ്രവേശനം. മുതിര്‍ന്നവര്‍ക്ക് നാല്‍പ്പത് രൂപയും കുട്ടികള്‍ക്ക് ഇരുപത് രൂപയുമാണ് ടിക്കറ്റ് നിരക്ക്. കെ.വിജയകുമാര്‍, വി.ബാലന്‍, പി.എ സന്തോഷ്, കെ നാസിം, പി.പി നാസര്‍, പി കമലാക്ഷന്‍, കെ.യു വിജയന്‍ എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.