ന്യൂഡല്‍ഹി: ബന്ധുനിയമന വിവാദത്തില്‍ കടുത്ത അതൃപ്തിയുമായി സി.പി.ഐ. വിഷയം എല്‍.ഡി.എഫില്‍ ചര്‍ച്ച ചെയ്യണമെന്ന് ജനറല്‍ സെക്രട്ടറി സുധാകര്‍ റെഡ്ഡി ആവശ്യപ്പെട്ടു.  സര്‍ക്കാരിന്റെ സല്‍പ്പേര് കളങ്കപ്പെടുത്തുന്ന നപടിയാണ് ഉണ്ടായത്. സര്‍ക്കാരിന്റെ തീരുമാനങ്ങളും നിയമനങ്ങളും വിമര്‍ശനങ്ങള്‍ക്ക് അതീതമാകണമെന്നും സുധാകര്‍ റെഡ്ഡി ഒരു സ്വകാര്യ വാര്‍ത്താ ചാനലിന് നല്‍കിയ അഭിമുഖത്തില്‍ പറഞ്ഞു.
ഇക്കാര്യത്തില്‍ ഉചിതമായ തിരുത്തല്‍ നടപടി വേണം. നേതാക്കളുടെ ബന്ധുക്കളായതിന്റെ പേരില്‍ മാത്രം നിയമനം നല്‍കുന്ന രീതി ശരിയല്ല. അതേസമയം, നിശ്ചിത യോഗ്യതയുള്ളവരാണെങ്കില്‍ നേതാക്കളുടെ ബന്ധുക്കളാണെന്നതു വിവാദമാക്കേണ്ട കാര്യമില്ലെന്നും സുധാകര്‍ റെഡ്ഡി പറഞ്ഞു. യോഗ്യതയുണ്ടെങ്കില്‍ നേതാക്കളുടെ ബന്ധുവാണെന്നതു തടസമാകരുതെന്നും രാഷ്ട്രീയ നിയമനങ്ങള്‍ക്ക് എല്‍.ഡി.എഫ്  മാനദണ്ഡമുണ്ടാക്കണമെന്നും സുധാകര്‍ റെഡ്ഡി ആവശ്യപ്പെട്ടു. ഏറെ പ്രതീക്ഷകളോടെയാണ് ഇടതു മുന്നണിക്ക് ജനങ്ങള്‍ ഭരണം നല്‍കിയതെന്ന് നേതാക്കള്‍ ഓര്‍ക്കണം. സര്‍ക്കാരിന് ജനങ്ങളോട് ബാധ്യതയുണ്ടെന്നും അദ്ദേഹം പറഞ്ഞു.