കക്കട്ടില്‍: പാതയോരത്തെ കുറ്റിക്കാടുകള്‍ വെട്ടിമാറ്റാത്തതു അപകടഭീഷണി ഉയര്‍ത്തുന്നു. കുറ്റ്യാടി-വടകര സംസ്ഥാന പാതയില്‍ നരിപ്പറ്റ ബസ് സ്റ്റോപ്പിനോട് ചേര്‍ന്നു കിടക്കുന്ന കുറ്റിക്കാടുകളാണ് വാഹന യാത്രക്കാര്‍ക്ക് ദുരിതമായി വളര്‍ന്നു നില്‍ക്കുന്നത്.
ഇത് കാരണം തീക്കുനി, നരിപ്പറ്റ, കുറ്റ്യാടി ഭാഗത്തേക്കുള്ള ദിശാ ബോര്‍ഡ് മറഞ്ഞിരിക്കുന്നത് ദീര്‍ഘദൂര സര്‍വീസ് നടത്തുന്ന ബസുകള്‍ക്കും വഴി പരിചയമില്ലാത്തവര്‍ക്കും ബുദ്ധിമുട്ട് സൃഷ്ടിക്കുന്നു. നരിപ്പറ്റ റോഡില്‍ നിന്നു സംസ്ഥാന പാതയിലേക്കിറങ്ങി വരുന്നതും, കുറ്റ്യാടി ഭാഗത്തേക്കു പോകുന്നതുമായ വാഹനങ്ങള്‍ക്കും, കാല്‍നടയാത്രക്കാര്‍ക്കും ഭീഷണിയായ കാട് വെട്ടിമാറ്റാന്‍ അധികൃതര്‍ ശ്രദ്ധിക്കാത്തത് നാട്ടുകാരിലും ആശങ്കയുണ്ടാക്കുന്നു.
നിരവധി അപകടങ്ങള്‍ നടക്കുന്ന വീതി കുറഞ്ഞ സംസ്ഥാന പാതയോരത്ത് വളര്‍ന്ന് പൊങ്ങിയ കാടുകള്‍ വെട്ടിമാറ്റി വൃത്തിയാക്കിയില്ലെങ്കില്‍ വന്‍ ദുരന്തത്തിനു കാരണാമായേക്കാമെന്ന് നാട്ടുകാര്‍ ആരോപിക്കുന്നു.