കട്ടാങ്ങല്‍: എന്‍.ഐ.ടി ലേഡീസ് ഹോസ്റ്റലിലെ കക്കൂസ് മാലിന്യം പൊതു റോഡിലേക്ക് തുറന്നുവിട്ട എന്‍.ഐ.ടി അധികൃതരുടെ നടപടികള്‍ക്കെതിരേ യൂത്ത് കോണ്‍ഗ്രസ് കട്ടാങ്ങല്‍ മേഖലാ കമ്മിറ്റി പ്രധിഷേധിച്ചു. നിത്യേന നൂറു കണക്കിനു യാത്രക്കാരും വാഹനങ്ങളും കടന്നു പോകുന്ന കട്ടാങ്ങല്‍ -കുന്ദമംഗലം റോഡിലേക്കാണ് മലിനജലമൊഴുക്കുന്നത്.
ഇന്ത്യയിലെ തന്നെ ഏറ്റവും വലിയ സാങ്കേതിക വിദ്യാഭ്യാസ സ്ഥാപനങ്ങളിലൊന്നായ എന്‍.ഐ.ടിയുടെ നടപടി ലജ്ജിപ്പിക്കുന്നതാണെന്നും ഇത് തുടര്‍ന്നാല്‍ പ്രദേശവാസികളുമായി ചേര്‍ന്ന് ശക്തമായ പ്രക്ഷോഭ പരിപാടികള്‍ സംഘടിപ്പിക്കുമെന്നും യോഗം മുന്നറിയിപ്പു നല്‍കി. ഷരീഫ് മലയമ്മ,ജബ്ബാര്‍ കെ, ബാബു കൊളോച്ചാല്‍ സംസാരിച്ചു.