കോഴിക്കോട്: ജില്ലാ ഫുട്‌ബോള്‍ അസോസിയേഷന്‍ സംഘടിപ്പിച്ച ജൂനിയര്‍ ഫുട്‌ബോള്‍ ടൂര്‍ണമെന്റില്‍ വെള്ളിമാട്കുന്ന് ക്രസന്റ് ഫുട്‌ബോള്‍ അക്കാദമി ജേതാക്കളായി. ഇന്നലെ നടന്ന ഫൈനല്‍ മത്സരത്തില്‍ സാമൂതിരി ഹയര്‍ സെക്കന്‍ഡറി സ്‌കൂളിനെ ഒന്നിനെതിരേ രണ്ടു ഗോളുകള്‍ക്ക് പരാജയപ്പെടുത്തിയാണ് ക്രസന്റ് ജേതാക്കളായത്. ക്രസന്റിന് വേണ്ടി 52-ാം മിനുട്ടില്‍ സുജിലും 56-ാം മിനുട്ടില്‍ അസ്മലും സാമൂതിരിക്ക് വേണ്ടി 14-ാം മിനുട്ടില്‍ നബീലുമാണ് ഗോളുകള്‍ സ്‌കോര്‍ ചെയ്തത്.
നവംബറില്‍ കോഴിക്കോട്ട് നടക്കുന്ന ജൂനിയര്‍ അന്തര്‍ജില്ലാ ഫുട്‌ബോള്‍ ടൂര്‍ണമെന്റില്‍ പങ്കെടുക്കുന്ന കോഴിക്കോട് ജില്ലാ ടീമിന്റെ കോച്ചിങ് ക്യാംപിലേക്ക് 40പേരെ തിരഞ്ഞെടുത്തു. വിജയികള്‍ക്ക് മുന്‍ എം.എല്‍.എ എം.വി ശ്രേയസ്‌കുമാര്‍ ട്രോഫികള്‍ സമ്മാനിച്ചു.
കെ.ഡി.എഫ്.എ വൈസ് പ്രസിഡന്റ് സി. ഉമര്‍ അധ്യക്ഷനായി. കെ.ഡി.എഫ്.എ സെക്രട്ടറി പി. ഹരിദാസ്, സി. കബീര്‍ദാസ്, പി.പി.സി കൃഷ്ണകുമാര്‍, സി. പ്രിയേഷ് കുമാര്‍, സുശീല്‍കുമാര്‍, മോഹന്‍ കൂരിയാല്‍ പ്രസംഗിച്ചു.