മഞ്ചേരി: പിണറായിയുടെ പൊലിസിന് രാജാവിനേക്കാള്‍ വലിയ രാജഭക്തിയാണെന്ന് പി. അബ്ദുല്‍ ഹമീദ് എം.എല്‍.എ. മലപ്പുറം പാര്‍ലമെന്റ് മണ്ഡലം യൂത്ത് കോണ്‍ഗ്രസ് പ്രസിഡന്റ് റിയാസ് മുക്കോളിയെ മഞ്ചേരി സബ്ജയിലില്‍ സന്ദര്‍ശിച്ചശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
മുഖ്യമന്ത്രിയെ കരിങ്കൊടി കാണിക്കുകയെന്ന നിസാര കാര്യത്തിനാണ് ദിവസങ്ങളോളം യുവജന നേതാവിനെ റിമാന്‍ഡില്‍ പാര്‍പ്പിച്ചിരിക്കുന്നത്. കഴിഞ്ഞ ദിവസം എടവണ്ണപ്പാറയില്‍വെച്ച് മുഖ്യമന്ത്രിയെ കരിങ്കൊടി കാണിച്ചതിനാണ് റിയാസ് മുക്കോളിയെ അറസ്റ്റ് ചെയ്തത്. മഞ്ചേരി മണ്ഡലം മുസ്‌ലിംലീഗ് ജന.സെക്രട്ടറി വല്ലാഞ്ചിറ മുഹമ്മദലിയും എം.എല്‍.എയൊടൊപ്പമുണ്ടായിരുന്നു.