തൃക്കരിപ്പൂര്‍ : പാതിവഴിയില്‍ നിര്‍മാണം നിലച്ച തെക്കെകാട് പടന്ന കടപ്പുറം തൂക്കുപാലം പ്രവര്‍ത്തി പുനരാംഭിക്കണമെന്ന ആവശ്യം വീണ്ടും ശക്തമായി. 2009ലാണ് കവ്വായിക്കായലില്‍ മാടക്കാലിലും തെക്കെകാടിലും രണ്ടു തൂക്കുപാലങ്ങള്‍ നിര്‍മിക്കാന്‍ നടപടി സ്വീകരിച്ചത്.
വ്യവസായ വകുപ്പിന്റെ കെല്ലിന് നിര്‍മാണ ചുമതലയും നല്‍കി. 2011 ല്‍ നിര്‍മാണം ആരംഭിച്ച രണ്ടു തൂക്കുപാലങ്ങളില്‍ മാടക്കാലിലെ പാലം 2013ല്‍ ഉദ്ഘാടനം ചെയ്തിരുന്നു. എന്നാല്‍ രണ്ടുമാസം കൊണ്ട് പാലം കായലില്‍ തകര്‍ന്ന് വീണതോടെയാണ് തെക്കെകാടിലെ പ്രവര്‍ത്തി നിര്‍ത്തിവച്ചത്. രണ്ടുകരയിലും 20 അടി ഉയരത്തില്‍ കോണ്‍ക്രീറ്റ് തൂണുകളും, ആറു അനുബന്ധ തൂണുകളും പൂര്‍ത്തിയായിട്ടുണ്ട്. നടപ്പാത ഒരുക്കുന്നതിന് രണ്ടു തൂണുകള്‍ തമ്മില്‍ ഇരുമ്പു വടവുമായി ബന്ധിപ്പിച്ചു. അന്തിമ ഘട്ടത്തിലെത്തി നില്‍ക്കെയാണ് നിര്‍മാണം നിലച്ചത്. നിര്‍മാണത്തിലെ അശാസ്ത്രീയാണ് മാടക്കാലിലെ പാലം തകരാനിടയായതെന്ന് വിജിലന്‍സിന്റെ അന്വേഷണ സംഘം കണ്ടത്തിയിരുന്നു.
സംഭവത്തില്‍ കെല്‍ എംഡി ഉള്‍പ്പെടെ നാലുപേരെ പ്രതിയാക്കി കേസടുക്കുകയും ചെയ്തിട്ടുണ്ട്. 280 മീറ്റര്‍ നീളമുളള സംസ്ഥാനത്തെ നീളം കൂടിയ പാലങ്ങളില്‍ ഒന്നാണ് തെക്കെകാടിലേത്.
ആറു കോടി രൂപയാണ് രണ്ട് പാലങ്ങളുടെ നിര്‍മാണ ചിലവ്. ഈ തുക സര്‍ക്കാര്‍ കെല്ലിന് കൈമാറിയിരുന്നു. കോടികള്‍ നഷ്ടം വരുത്തിയ കെല്ലില്‍ നിന്നു പണം തിരിച്ച് പിടിക്കാന്‍ വിജിലന്‍സ് നടപടി സ്വീകരിച്ചിരുന്നു.
ബാക്കിയുള്ള പ്രവര്‍ത്തിക്ക് പുതിയ കരാര്‍ പുതുക്കി നല്‍കേണ്ടതുണ്ട്. എന്നാല്‍ പാലത്തിന്റെ സുരക്ഷിതത്വത്തെ കുറിച്ച് നാട്ടുകാര്‍ ആശങ്കയിലാണ്. നിര്‍മാണത്തിലുളള തെക്കെകാട് പാലത്തിന്റെ മധ്യഭാഗത്ത് ഒരു തൂണ്‍ കൂടി സ്ഥാപിച്ച് ബലം ഉറപ്പുവരുത്തണമെന്നും ആവശ്യം ഉയര്‍ത്തിട്ടുണ്ട്. അതിനിടെ തെക്കെകാട് പാലം എം രാജഗോപാലന്‍ എം.എല്‍.എ സന്ദര്‍ശിച്ചു. വിനോദ സഞ്ചാര മേഖലക്ക് ഗുണകരമാവുന്ന ഈ പാലം യാഥാര്‍ഥ്യമാക്കുന്നതിന് തുടര്‍ നടപടി സ്വീകരിക്കുമെന്ന് എം.എല്‍.എ ഉറപ്പ് നല്‍കിയിട്ടുണ്ട്.