വിഴിഞ്ഞം: കോവളത്ത് തിരെഞ്ഞെടുപ്പ് പ്രചാരണം ആവേശത്തിലേക്ക്, വോട്ടര്‍മാരെ പാട്ടിലാക്കാന്‍ മുതിര്‍ന്ന നേതാക്കളും മണ്ഡലത്തിലേക്ക്. ഇന്ന് മുഖ്യമന്ത്രി ഉമ്മന്‍ചാണ്ടി രാവിലെ 8.30ന് പൂവാറില്‍ സംസാരിക്കും തുടര്‍ന്ന് തീരദേശ പ്രദേശങ്ങളായ കരിങ്കുളം കാഞ്ഞിരംകുളം എന്നിവിടങ്ങളിലും തെരഞ്ഞെടുപ്പ് യോഗങ്ങളില്‍ പങ്കെടുക്കും. കോവളം മണ്ഡലത്തിലെ യു.ഡി.എഫ് സ്ഥാനാര്‍ഥി എം.വിന്‍സെന്റിന് വിഴിഞ്ഞത്ത് ഉജ്ജ്വല സ്വീകരണം.മഴയെ അവഗണിച്ച് നൂറുകണക്കിന് യു.ഡി.എഫ് പ്രവര്‍ത്തകര്‍ ബൈക്കുകളില്‍ സ്ഥാനാര്‍ഥിയെ അനുഗമിച്ചു.ഓരോ സ്വീകരണകേന്ദ്രങ്ങളിലും സ്ത്രീകളും കുട്ടികളും അടക്കമുള്ള നിരവധിപേര്‍ തടിച്ച് കൂടിയിരുന്നു. വിഴിഞ്ഞത്തെ സ്ഥാനാര്‍ഥി പര്യടനം ഇന്നലെ പുളിങ്കുടിയില്‍ നിന്നാണ് തുടങ്ങിയത്.വിഴിഞ്ഞം പദ്ധതി പ്രദേശം ഉള്‍ക്കൊള്ളുന്ന മുല്ലൂര്‍,ശാന്തിപുരം,കിടാരക്കുഴി,മുക്കോല,വിഴിഞ്ഞത്തെ മത്സ്യത്തൊഴിലാളിമേഖല എന്നിവിടങ്ങളിലാണ് ഇന്നലെ സ്ഥാനാര്‍ഥി പര്യടനം നടന്നത്.വിഴിഞ്ഞത്തെ പര്യടനത്തിന്റെ ഉദ്ഘാടനം മുന്‍ മന്ത്രി എം.ആര്‍.രഘുചന്ദ്രബാല്‍ നിര്‍വഹിച്ചു.എല്‍.ഡി.എഫ് തെരഞ്ഞെടുപ്പ് സ്ഥാനാര്‍ഥി പര്യടനം കഴിഞ്ഞ ദിവസം കോട്ടുകാല്‍ പഞ്ചായത്തില്‍ അവസാനിച്ചു.നിരവധി പ്രവര്‍ത്തകര്‍ സ്ഥാനാര്‍ഥി പര്യടനത്തില്‍ പങ്കെടുത്തു.എന്‍.ഡി.എ സ്ഥാനാര്‍ഥി റ്റി.എന്‍.സുരേഷും ശക്തമായ പ്രചാരണവുമായി ഇരുമുന്നണികള്‍ക്കൊപ്പമുണ്ട്‌