തൊട്ടില്‍പ്പാലം: ഐ.എസ് ബന്ധം സംശയിച്ച് അറസ്റ്റിലായ കുറ്റ്യാടി സ്വദേശി വളയന്നൂര്‍ നങ്ങീലംകണ്ടി റംഷാദിന്റെ വീടിന് നേരെ അജ്ഞാത സംഘത്തിന്റെ ആക്രമണം. ആക്രമണത്തില്‍ വീടിന്റെ ജനല്‍ചില്ലകള്‍  തകര്‍ന്നു. വൈദ്യുതി മീറ്ററും ഫര്‍ണിച്ചറും കുടിവെള്ളപൈപ്പും നശിപ്പിച്ചിട്ടുണ്ട്. കഴിഞ്ഞ ദിവസം അര്‍ധരാത്രി പന്ത്രണ്ടോടെയാണ് സംഭവം.
റംഷാദിന്റെ കുടുംബം സംഭവസമയത്ത് വീട്ടിലില്ലായിരുന്നു. ആക്രമണത്തെ തുടര്‍ന്ന് വീടിന് പൊലിസ് കാവലേര്‍പ്പെടുത്തിയിട്ടുണ്ട്.  
കഴിഞ്ഞ മൂന്നിനായിരുന്നു ഐ.എസ്. ബന്ധം സംശയിച്ച് എന്‍.ഐ.എ സംഘം റംഷാദ് അടങ്ങുന്ന ആറുപേരെ അറസ്റ്റ് ചെയ്തത്. കണ്ണൂര്‍ ജില്ലയിലെ പാനൂര്‍ കനകമലയില്‍ നടന്ന റെയ്ഡിനു പിന്നാലെയാണ് എന്‍.ഐ.എ സംഘം കുറ്റ്യാടിയിലെത്തി റംഷാദിനെ അറസ്റ്റ് ചെയ്തത്.  റംഷാദിന്റെ പിതൃസഹോദരന്‍ നങ്ങീലംകണ്ടി ജാസിമും ഇതേകേസില്‍ എന്‍.ഐ.എ കസ്റ്റഡിയിലാണ്.