ഐക്യരാഷ്ട്രസഭ:  ഐക്യരാഷ്ട്ര സഭയുടെ പുതിയ സെക്രട്ടറി ജനറലായി പോര്‍ചുഗല്‍ മുന്‍ പ്രധാനമന്ത്രി അന്റോണിയോ ഗുട്ടെറസിനെ ഔദ്യോഗികമായി പ്രഖ്യാപിച്ചു. ജനുവരി ഒന്നിന് അദ്ദേഹം ചുമതലയേല്‍ക്കും. 2005 മുതല്‍ പത്തുവര്‍ഷമായി യു.എന്‍ അഭയാര്‍ഥി ഏജന്‍സി മേധാവിയായിരുന്നു.  
യു.എന്‍ ആസ്ഥാനത്ത് നടന്ന പൊതുസഭയുടെ പ്രത്യേക സമ്മേളനത്തിലാണ് ഗുട്ടെറസിനെ ബാന്‍ കി മൂണിന്റെ പിന്‍ഗാമിയായി തെരഞ്ഞെടുത്തത്. യു.എന്നിന്റെ ഒന്‍പതാമത്തെ സെക്രട്ടറി ജനറലാകും 67കാരനായ ഗുട്ടെറസ്. കഴിഞ്ഞയാഴ്ച യു.എന്‍ രക്ഷാസമിതിയിലെ 15 അംഗ രാഷ്ട്രങ്ങള്‍ നടത്തിയ ചര്‍ച്ചക്കുശേഷമാണ് ഗുട്ടെറസിന്റെ പേര് പൊതുസഭയിലേക്ക് നാമനിര്‍ദേശം ചെയ്തത്. തെരഞ്ഞെടുപ്പിനുശേഷമുള്ള മറ്റു നടപടിക്രമങ്ങള്‍ അടുത്തയാഴ്ച ആരംഭിക്കും. ഇതിന്റെ ഭാഗമായി അസംബ്ലി പ്രസിഡന്റ് പീറ്റര്‍ തോംസണ്‍ ഗുട്ടെറസുമായി പ്രത്യേക കൂടിക്കാഴ്ച നടത്തുന്നുണ്ട്. തുടര്‍ന്ന് സഭാ സമ്മേളനവും നടക്കും.