തിരുവനന്തപുരം: അനധികൃത നിയമനത്തിനെതിരേ നിയമസഭയ്ക്ക് അകത്തുംപുറത്തും പ്രതിഷേധിക്കാനൊരുങ്ങുന്ന പ്രതിപക്ഷത്തിന് വിജിലന്‍സ് ഡയറക്ടറുടെ കുരുക്ക്. ബന്ധുനിയമന വിവാദത്തില്‍ മുന്‍ സര്‍ക്കാരിന്റെ കാലത്തെ നിയമനങ്ങളും പരിശോധിക്കാന്‍ വിജിലന്‍സ് തീരുമാനിച്ചതായി അറിയുന്നു. തിരുവനന്തപുരം സ്വദേശി എ.എച്ച് ഹഫീസ് നല്‍കിയ പരാതിയെ തുടര്‍ന്നാണ് ജയരാജനെതിരേയുള്ള അന്വേഷണത്തിനൊപ്പം മുന്‍ സര്‍ക്കാരിന്റെ കാലത്തെ നിയമനങ്ങളിലും അന്വേഷണം നടത്താന്‍ വിജിലന്‍സ് ഡയറക്ടര്‍ തീരുമാനിച്ചത്. ഇതോടെ ഇ.പി ജയരാജനൊപ്പം പ്രതിപക്ഷത്തെ പല പ്രമുഖരും വിജിലന്‍സിന്റെ കുരുക്കിലാകും.
 ഉമ്മന്‍ചാണ്ടിയുടെ ബന്ധു കുഞ്ഞ് ഇല്ലമ്പള്ളിക്ക് സഹകരണ സര്‍വിസ് പരീക്ഷാ ബോര്‍ഡ് അധ്യക്ഷനായി മുന്‍ സര്‍ക്കാര്‍ നിയമനം നല്‍കിയിരുന്നു. അന്ന് ആഭ്യന്തരമന്ത്രിയും നിലവില്‍ പ്രതിപക്ഷനേതാവുമായ രമേശ് ചെന്നിത്തലയുടെ അനുജന്‍ കെ.വേണുഗോപാലിനെ കേരള ഫീഡ്‌സില്‍ മാനേജിങ് ഡയറക്ടറായി നിയമിച്ചു. സഹോദരനെ ശബരിമല എക്‌സിക്യുട്ടിവ് ഓഫിസറായി നിയമിച്ചുവെന്നാണ് മുന്‍ ദേവസ്വം മന്ത്രി വി.എസ് ശിവകുമാറിന് എതിരേയുള്ള ആരോപണം.
വിജിലന്‍സ് അന്വേഷണം നേരിടുമ്പോഴായിരുന്നു ശിവകുമാര്‍ സഹോദരനെ നിയമിച്ചത്. മുന്‍മന്ത്രി അനൂപ് ജേക്കബിന്റെ ഭാര്യ അനിലാ മേരി വര്‍ഗീസിനെ ഭാഷാ ഇന്‍സ്റ്റിറ്റ്യൂട്ട് ഡയറക്ടറായും സഹോദരിയെ  കേരള ഐ.ടി ഇന്‍ഫ്രാസ്ട്രക്ടര്‍ മാര്‍ക്കറ്റിങ് മാനേജരായും നിയമിച്ചുവെന്നും വിജിലന്‍സിന് ലഭിച്ച പരാതിയിലുണ്ട്. സര്‍വവിജ്ഞാനകോശം ഡയറക്ടറായി നിയമിതയായ മുന്‍ സ്പീക്കര്‍ ജി.കാര്‍ത്തികേയന്റെ ഭാര്യ ഡോ എം.ടി സുലേഖയുടെ പേരും പരാതിയിലുണ്ട്. മന്ത്രിയായിരുന്ന കെ.സി ജോസഫ് നിരവധി ഡി.സി.സി ഭാരവാഹികളുടെ ഭാര്യമാരെ നോര്‍ക്കയില്‍ അനധികൃതമായി നിയമിച്ചു. യു.ഡി.എഫ് എം.എല്‍.എമാരായിരുന്ന ആര്‍.ശെല്‍വരാജിന്റെ മകളെ വെയര്‍ഹൗസിങ് കോര്‍പറേഷന്റെ അസിസ്റ്റന്റ് മാനേജരായും ഉമ്മര്‍ മാസ്റ്ററുടെ മരുമകന്‍ കെ.പി അബ്ദുല്‍ ജലീലിനെ സ്‌കോള്‍ കേരള ഡയറക്ടറാക്കിയതും സംബന്ധിച്ചും പരാതി വിജിലന്‍സിന് ലഭിച്ചിട്ടുണ്ട്. ഈ നിയമനങ്ങളാകെ അനധികൃതവും വേണ്ടത്ര യോഗ്യതകളില്ലാതെയുമാണെന്നാണ് പരാതിയില്‍ പറയുന്നത്.
ഇതോടെ അന്വേഷണം നടന്നാല്‍ ബന്ധുനിയമനം ഉയര്‍ത്തി സി.പി.എമ്മിനെയും ഇടതുപക്ഷത്തെയും പ്രതിരോധത്തിലാക്കിയ യു.ഡി.എഫ് നേതൃത്വവും വെട്ടിലാകും.